Online Reporter
Nkosilathi Sibanda
UMNCINTISWANO weCarling Black Label National Pool Tournament usufinyelele kusigaba sokucina ngemva kokuphethwa kwemidlalo yezabelo, lapho abadlali abanengi ababonise ithalenta eliphezulu.
Lumncintiswano, lonyaka udonse inkulungwane zabadlali labalandeli, okutshengisa ukuthi umdlalo we-pool uyaqhubeka ukhula eZimbabwe.
Abaqoqi bomncintiswano bathe imidlalo yokuvula ihambe kuhle, abadlali bebonisa ubungcitshi, ukuzimisela lokuziphatha kuhle ngesikhathi sokuncintisana.
Ngaphandle komdlalo, umncintiswano uphinde wanceda ukukhulisa amabhizimusi amancane endaweni ebekuphethwe khona imidlalo.
Umphathi wezokuthengiselana uKundayi Mawema uthe bajabuliswa yikukhula komdlalo we-pool.
“Siyaziqhenya ngengqubekela phambili esiyibonayo emdlalweni we-pool. Ukwanda kwabadlali lokuphakama kwezinga lokudlala kutshengisa uthando lokuzimisela kwabantu abanengi.
“Sibonga wonke umuntu obeyingxenye yalumncintiswano,” kutsho uMawema.
Uthe kuyajabulisa futhi ukubona inani labesifazane abangena kumdlalo liqhubeka lisanda, okutshengisa ukuthi iCarling Black Label iyaqhubeka ikhuthaza ukulingana lokuvulela wonke umuntu amathuba afanayo.
Amehlo wonke okwakhathesi asekhangele amaNational Finals azakuba seMasvingo mhlaka 11 Ntulikazi, lapho abadlali abangu-80, abesilisa labesifazane, abazancintisana khona befuna ukuthwala isicoco.
Ozanqoba uzathola i-US$2 500 letafula elitsha le-pool. Owesibili uzahamba le-US$1 500, owesithathu athole i-US$1 000, kuthi owesine athole i-US$500.
