Online Reporter
Nkosilathi Sibanda loLovemore Dube
INHLANGANISO yeZifa isibike ukuba amaWarriors azasebenzisa inkundla yeMoses Mabhida, eDurban kumdlalo wabo leSouth Africa, owe-2026 World Cup Qualifiers.
Umdlalo lo uzabe umhlaka 10 Mfumfu ngehola lesithathu emini. Kulumkhankaso weWorld Cup, amaWarriors asebenzise inkundla zakwamanye amazwe ngenxa yokuthi kuleli akulankundla evunyelwa yiCaf. Andubana kukhethwe inkundla yeMoses Mabhida, kwakukhangelelwe ukuthi kudlalelwe e-Obed Itani Chilume Stadium eFrancistown, eBotswana.
Umqeqetshi wamaWarriors uMichael Nees usekhethe abadlali abazabumba iqembu eliya eDurban.
UNees ulethuba lokuthi abukele abadlali bakhe okokucina kungakayiwa kunkezo yeAfcon eMorocco ngoMpalakazi.
Bekukhangelelwe ukuthi mhlawumbe kungaba labanye abatsha abadlala lapha ekhaya abangabizwa kodwa uzihlalele labensukwini, oMartin Maphisa oweMWOS, Emmanuel Jalai weDynamos, loGodknows Murwira weScottland.
Ubuye wabiza njalo uTerrence Dzukamanja, Khama Billiat, Knowledge Musona loWalter Musona abeScottland okutshiye imibuzo kundebe zabanengi.
Bekudingwa ukuthi kube loTymon Machope, Washington Navaya, Billy Veremu, Reason Sibanda loInnocent Masiiwa. Laba ngabadlali abahlohlayo njalo balendlala yokuthi benze amabizo kukanti inengi lababizwayo zinkabi ezikhatheleyo, ezingasela mphako.
Ilizwe leZimbabwe lenelisa ukudlala lafika kubanga lokuthi libephakathi kwamazwe afika amatshumi amabili lane. Lawa azancintisana kubangwa inkezo enkulu yegumbi le-Africa okuyinkezo enkulu.
Imidlalo le inika umqeqetshi ithuba lokuthi akhangele abadlali abambalwa abone kumbe balakho okungenza abakhethe ahambe labo eMorocco lapho okukhangelelwe ukuthi mhlawumbe kuzaba lesavunguzane esingenza abafana bakhe badlale ngcono.
Kusenjalo, iZifa isiqhatshe uKaitano Tembo ukuthi abengumsekeli kamqeqetshi, uMichael Nees.
UTembo ukhuza iqembu leSekhukhune United eSouth Africa.
Wethulwe ngoLwesibili eHarare. Uzaqala umsebenzi kumdlalo wamaWarriors.
Umqeqetshi uNees uthe uyamethemba uTembo.
“UKaitano ngiyamethemba. Sahlangana okwakuqala ngo2003, ngesikhathi ngisasebenzela eSouth Africa. Ulolwazi olunengi, oluzaphathisa iqembu.
“Kwakunzima ukuthi simlethe ngomnyaka odluleyo ngoba wayebambekile. Kodwa, kuthe sibekwa kuqoqo linye leSouth Africa ku-Afcon ka2025, ngacabanga yena.”
Kukhangelelwe ukuthi uTembo ongomunye wabalutshwana abangakaze baphiwa ithuba lokuphathisa kumaWarriors, asebekebafika kuzinga eliphezulu ukuthi kwelakusasa angakhokhela amaWarriors kuAfcon leminye imidlalo ezayo.
Iqembu elikhethiweyo:
Onozinti: Washington Arubi, Elvis Chipezeze, Martin Mapisa.
Imvimbi: Gerald Takwara, Munashe Garan’anga, Teenage Hadebe, Brendan Galloway, Emmanuel Jalai, Godknows Murwira, Jordan Zemura, Divine Lunga.
Abasesiswini: Marvelous Nakamba, Jonah Fabisch, Marshall Munetsi, Tawanda Chirewa, Knowledge Musona, Khama Billiat, Bill Antonio,
Abagadli: Tawanda Maswanhise, Tawanda Maswanhise, Walter Musona, Prince Dube, Thando Ngwenya.
