admin
Buhlebenkosi Gaule
ABANTU abaphila lobugoga sebekhuthazwe ukuba badinge indlela ezingcono zokuziphilisa ngoba ukuhlala becela uncedo ezitaladeni ayisiyondlela yokuphila eqondileyo.
Inkuthazo le ivele kuNkosikazi Sipho Majole obengumhlonitshwa kumkhosi wokukhankasela amalungelo abantu abaphila lobugoga kuWadi 7 elokitshini leMakokoba ngoLwesihlanu kuviki ephelileyo.
UNkkz Majole laye ophila lobugoga uthe abaphila lobugoga akumelanga bazikhangelele phansi ngoba labo bayenelisa ukuphumelela emisebenzini yabo.
“Mina nginje ngingumama olomuzi njalo ngiyasebenza ukuze ngincedise ekukhuliseni imuli yami, kangiceli ezitaladeni.
“Bomama nxa ulomntwana okhubazekileyo endlini akutsho ukuba umntwana lo useliqanda, umfundise imisebenzi yonke okumele ayenze.
“Ukukhubazeka akutsho ukuthi akusamelanga ufunde ngitsho lokugezisa imiganu ngoba awukwazi ukuba lumntwana uzahlala njani empilweni,” kutsho uNkkz Majole.
UMnumzana Benjamin Moyo ongumkhokheli wabakhubazekileyo kuWadi 7 ugcizelele ukuba ukuhlala ezitaladeni bedinga uncedo kwabantu abaphila lobugoga kwenza bakhangelelwe phansi.
“Abantu abaphila lokukhubazeka akumelanga baziphilise njengabantu abangesenelisiyo ukwenza imisebenzi etshiyeneyo ngoba wonke umuntu ulethalenta aliphiwa nguMdali, abanye bethu benelisa ukuthunga, abanye ngabadwebayo bedweba ngenyawo, abanye njalo ngabenelisa ukuhlabela kungakho omunye lomunye kumele asebenzise lelothalenta ukuziphilisa hatshi ukucela,” kutsho uMnu Moyo.
Okhulume emele iJairos Jiri Community Out-reach uMnumzana Albert Tonderai uthe umkhankaso lo ubuhlose ukuthi kwazakale ukuba abaphila lobugoga kumele bathole amalungelo abo abalisa imfundo, ulwazi ngegcikwane leHIV le Aids, indlela eziqondileyo zokuphila (livelihood) kanye lokutholiswa ithuba lokuya ku-rehabilitation.
Esinye isakhamuzi esincedisa abaphila lobugoga kuWadi 7 eMakokoba uNkosikazi Skhumbuzo Mpofu uphethe ngokutshiyela abezibhedlela; omongi labodokotela, abezempilakahle ingqobe yokuthi kumele bafunde ulimi lwezimungulu (sign language) ukuze lanxa besiya ezibhedlela bathole usizo lula.
Online Reporter