admin
Ncekwenhle Ncube
“Nkosi, imbanje engizilimayo ngizisebenzisa ukwelapha umkhuhlane weBP (high blood pressure) lokuxotsha abathakathi emzini wami.”
La ngamazwi esinye isibotshwa ebesimiswe phambi komthethwandaba weTredgold koBulawayo ngoLwesibili.
Umsolwa uOphias Don Gwandangwe oleminyaka yokuzalwa engu-61 welokitshini leCowdray Park ubemiswe emthethwandaba lo esetheswa icala lokutholakala elime imbanje esivandeni sakhe ngokungekho emthethweni.
Inkundla izwe ukuthi umsolwa uGwandangwe ubanjwe xhaka ngamapholisa elime izihlahla zembanje ezingaba ngamasentimitha angu-60.
Kubikwa mhlaka 24 kuyonale inyanga amapholisa ancwetsha udletshana yizakhamizi ukuthi umsolwa ulima imbanje esivandeni sakhe okuyikho okwabangela ukuthi bayehlola wasebotshwa.
Umtshutshisi kulelicala uMnunzana Taurai Hondoyemoto wethulele inkundla ukuthi umsolwa watholakala elezihlahla zembanje ezingaba zingalo ezimbili ubude okukhanya ubezithengisela abantu abahlala eduze laye.
Ebuzwa mayelana lecala abeletheswa umsolwa ubikele inkundla ukuthi imbanje uzilimile kodwa uzisebenzisa ukwelapha umkhuhlane weBP njalo uzihlanganisa lemithi yakhe ukuxotsha abathakathi emzini wakhe njengoba ethethe isithembo.
Ubuye njalo walandula ukuthi uyazithengisa.
Umantshi kulelicala uNkosazana Evelyn Mashavakwe uthole umsolwa elecala lokulima imbanje ngokungekho emthethweni.
Umsolwa ugwetshelwe ukuyasebenza kungelambadalo ngoba kubonakale ukuthi uyaqala ukweqa umthetho njalo yindoda elesithembo labantwana abancane abasafunda.
Online Reporter