Online Reporter
KULESAGA sesintwini esithi isigogo sigoqwa sisesemanzi ngoba ulakho ukusigoqa ngohlobo oluthanda ngaso kodwa ungasekela some siyakuthwalisa nzima kumbe sicine sikwehlule ukusigoqa.
Abazali abanengi sebesehlulwa ngabantwababo njalo bayesaba lokubakhuza, khona ukubathela uswazi angisakhulumi uzwa inengi labo lisithi ungamtshaya umntwana uyakumangalela emapholiseni kumbe azonde anathe umuthi wamagundwane afe kumbe ayezibophela.
Ngeviki ephelileyo ngabizwa esikolo lapho engingumgcinisihlalo wekhomithi yabazali iSDC. Kwakulabantwana ababephule umthetho wesikolo besebenzisa izidakamizwa abanye bakhona bahamba lamajaha abo bayotshona edolobheni bezikholisela.
Kuthe sekubizwe labazali babo ngezwa ngitshwaqa inwele legazi lami lihloba ngoba phose bonke abazali laba belitshumi bahlabela ingoma eyodwa yokuthi abantwana bakulezinsuku abasakhuzeki ngoba ungamfaka uswazi abanye bakhona bahle bantunye bangene ihlathi ungazabe usazi ukuthi utshone kuphi.
Abanye njalo bakhala ngokuthi inengi labantwana alisahloniphi sokungamahlongandlebe wodwa lesikolo ababalisi abasabatshayi kangako ngoba bethi umthetho uyabenqabela ukuthi basebenzise uswazi ngaze ngakhumbula ngensuku ngisakhula mina wawuthi nxa ungazibonanga inkomo, uvele ukwazi ukuthi uzabhaxabulwa uncitshwe
lesitshwala santambama ulale amathumbu ekhala umoya njalo uhle wazi ukuthi kumele uvuke empondo zankomo uphundla inkotha amazolo aphelele phezu kwamazwane akho lithi liphuma kunina ilanga usubuye lazo.
Wawuthi ufika ugeze uqonde esikolo, uthi ufika uphuzile umbalisi laye akuhlangabeze ngamampama engelandaba lokuthi uke wavuka wayadinga inkomo.
Omunye umzali owayelomntwana owayephule umthetho wesikolo wakhala inyembezi ethi yena wayengazalanga kodwa ebole amathumbu ngoba ingane yakhe ingamlaleli. Wathi nxa ekhuza umntanakhe umisana laye aphendule ngenkalakatha zenhlamba kuze kubukele omakhelwane.
Mina ngibona angani abazali bakulezinsuku baphatha abantwana okwamaqanda, yikho mhlawumbe nxa sebethe bakhula baba qotshwana bebavukela ukeketani bengasabahloniphi.
Ngiyangizwe kweminye imizi umntwana ephikisana lomzali wakhe kumbe umuntu omdala uzwe ethi mama ulamanga thula ngikutshele awazilutho wena, kambe nxa ungumzali ungavumela umntwana akhulume lawe ngaloluhlobo, awuboni ukuthi uyabe uzokhela amalahle ekhanda, uyabe usuvele wamona ngokumvumela ekhuluma umathanda njalo lalapho ayakhona uzafika enze njalo ngoba ebona kuqondile.
Abantwana yebo ngabethu kodwa asibafundiseni umthetho lapho awugoba khona udobhe okuluswazi umhasehase uzabona elahla, okunye njalo engibona kusenza abantwana bangasahloniphi abazali yikuthi mhlawumbe abantwana sebenakekelwa kakhulu ngosisi abasebenzayo kuzimuli ezitshiyeneyo, abazali babalesikhathi esilutshwane lemuli zabo.
Ngazibuza umhlangano usuphelile ukuthi nxa singaba labazali abesaba ukukhuza abantwababo ngoswazi bethi besaba ukuthi bazazibophela bayekelwe nje babe ngumhlambi kazelusile pho-ke eminyakeni ezayo siyoba yisizwe esinjani?
Bazali abantwana singabatotozi abakhule besazi ukuthi impilo iliviri, abantwana bangakhuliswa kuhle balakho ukumela noma yibunzima bani bempilo.
Ayixabene.
