Online Reporter
Nkosilathi Sibanda lo-Innocent Kurira
IQEMBU leHighlanders seliphinde lamisa umsebenzi umaqhuzu walo uDenzil Mnkandla, okwesibili phakathi kwenyanga ezintathu, njalo usemangalelwe emapholiseni.
Udaba lwakhe lufike emapholiseni kulandela insolo zokungaqondakali kwendlela aphatha ngayo imali zeqembu lisiya eBotswana ekuqaleni kwesizini.
Kubikwa ukuba uMnkandla unikwe incwadi yokumisa umsebenzi kuliviki, kulandela enye incwadi ayibhalela iqembu elazisa ukuthi usesehluleka ukuqhubeka esebenza ngenxa yokungaholi kwakhe kusukela ngoMbimbitho.
Lanxa ukumiswa kwakhe okwangemuva kuhlobene lesikhalazo sakhe sokungaholi, abafakazi abaqotho abasebenzela iBosso bathe uphenyo ngohambo lweBotswana luyaqhubeka njalo abaphathi bacabangisisa ngokwethula udaba emapholiseni nxa kungatholakalanga ubufakazi bokuthi iqembu lalahlekelwa yimali ngenxa yezenzo ezingekho emthethweni.
Omunye umfakazi uthe abaphathi bafuna kuqedwe kuqala uphenyo lwaphakathi, kodwa nxa kungatholakala ubufakazi bokulahlekelwa yimali, udaba lolu alusoze luphelele ekujezisweni ngaphakathi kweqembu kuphela.
Kuthiwa iqembu lingabe lalahlekelwa yimali efika ku-US$20 000 ngemva kokuthi kwangenela abantu abaphakathi ekuhleleni indawo zokulala lezinye inhlelo zohambo.
Ngemva kokumiswa kwakhe kokuqala, amagqwetha eHighlanders atshengisa ukuthi indlela eyayisetshenzisiwe yayingalandelanga umthetho, okwenza uMnkandla abuyiselwe emsebenzini uphenyo luqhubeka.
Kodwa-ke, impikiswano yabuya yavuka lapho uMnkandla ebhalela unmgcinisihlalo weqembu, uKenneth Mhlophe, esithi uyehluleka ukuqhubeka esebenza ngenxa yokuthi iqembu belingamholisi kusukela ngoMbimbitho.
