Londile Moyo
Christopher Nyika
KULABESIFAZANE abathathu, okugoqela lomntwana, abalimeleyo ngemva kokutshaywa yimota emgwaqweni weLuveve eduzane legaraji eliseceleni kweRenkini ngoMvulo ntambama.
Ingozi le, edonse amehlo abantu abanengi yenzakale eRedan Service Station (loba abanengi belokhu belibiza ngenkampani eyayiphethe kudala besithi kuko-Engine). Kubikwa ukuba imota iphume emgwaqweni yaqonda abantu abakade behamba ecaleni komgwaqo.
Abafakazi abakhulume lentatheli bathe abalimeleyo besebephumile emgwaqweni ngesikhathi imota ibalanda.
“Abantu abatshayiweyo besebephumile emgwaqweni, sebegade esamendeni esehlukanisa imigwaqo, lapho umtshayeli aze abaqonde wabatshaya ngemota,” kutsho omunye umfakazi.
Kodwa, umtshayeli wemota le uthe imbangela yengozi kube yikwehluleka kwemiqobotsho yemota.
Uthe imota yakhe ihlangabezane lodubo lolu ngemva kokudlula phezulu kwamandundulu, okumenze wasebenzisa i-hand break ukuzama ukuyimisa.
“Ngizamile ukubamba i-hand break yemota. Yikho lapho engibone khona abantu, ngacina sengibatshayile,” kutsho umtshayeli.
Amapholisa kunye labezempilakahle bafike masinyane endaweni yengozi, abalimeleyo bathwalelwa esibhedlela.
Online Reporter