Online Reporter
Getrude Manyande
MURUME wekuGwanda abhadhariswa faindi yeUS$100 mushure mekupa mapurisa mashoko enhema achiti akange abirwa nharembozha yake pamwe chete neUS$330 nevarume vana vaasingazive.
Arnold Siziba, wemumusha waMatshetsheni, akawanikwa aine mhosva mushure mekubvuma kuti akapa mashoko enhema kumapurisa apo nyaya iyi yakatongwa nemutongi wedare rekuBulawayo, VaGolden Mahamba.
Siziba akatongerwa kugara mujeri kwemwedzi mitatu, asi mutongo uyu wakasendekwa parutivi kwemakore mashanu nechitsidzo chekuti haafaniri kupara mhosva yakafanana neiyi panguva iyoyo.
Muchuchisi VaArnold Mudekunye vakaudza dare kuti musi wa16 Nyamavhuvhu, nenguva dza10 mangwanani, Siziba akaenda kukamba yemapurisa yeInsuza ndokunotaura kuti akange abirwa nharembozha yerudzi rweItel C8 neUS$330 nevarume vana vaasingazive.
“Mapurisa akaenda kunzvimbo yacho ndokuona kuti Siziba akange apa mashoko enhema, izvo zvakazoita kuti asungwe,” vanodaro VaMudekunye.
