Online Reporter
Liberty Dube ari kuCHIPINGE
VARUME vatatu vekuChipinge vanonzi vakabatsirana kuponda mumwe mugari weko mushure mekunge avatengesera imbwa yaive yabiwa.
Izvi zvakaitika nemusi weSvondo svondo rapera kudunhu raMambo Mutema apo vatatu ava — Clemence Chibvepi, Christopher Chibvepi naMartin Dube — vanonzi vakabatsirana kurova Lucky Tsegure nezvimiti nematanda muviri wake wose.
Tsegure akakuvara zvakanyanya mumusoro zvikaita kuti abude ropa rakawanda achibva ashaya.
Vatatu ava vanonzi vakatora mutumbi wake ndokunoukanda kumahombekombe kwerwizi rwaBudzi rwuri kwekare kuChipinge.
Mutauriri wemapurisa kudunhu reManicaland, Inspector Luxson Chananda, vanotsinhira nyaya iyi vachiti vari kutsvaga varume vatatu ava nemeso matsvuku sezvo vakanyangarika mushure mekupara mhosva iyi.
“Tsegure akatengesa imbwa kunaClemence ndokubhadharana zvakanaka. Mushure memazuva, Clemence akazoziva kuti imbwa iyi yaive yabiwa kune mumwe mugari weko anonzi Chimene.
“Clemence, mukoma wake Christopher neshamwari, Martin Dube vakazoenda kudoro rendari ndokusangana naTsegure neshamwari yake, Solomon Mudimba.
“Pakamuka kusanzwisisana pakati paClemence naTsegure apo Clemence aiti ainge amutengesera imbwa yakabiwa. Vanhu vaivepo vakazama kutaura naClemence kuti asiyane nekuita mhirizhonga asi vakakoniwa.
“Clemence, Christopher naDube vakazobatsirana kuzvuzvurudza Tsegure kubva pamusha paive nedoro ndokusvika naye kurwizi rwaBudzi chinambwe chemakiromita matatu. Vanonzi vakabatsirana kumurova nezvimiti uye nematanda.
“Vanonzi vakazozvuvira Tsegure, uyo aive akuvara zvikuru, kumahombekombe erwizi urwu ndokumusiyako,” vanodaro Insp Chananda.
Nemusi wa13 Chivabvu, Bothwell Sithole (24) ndiye akazoona mutumbi waTsegure.
Insp Chananda vari kukumbira veruzhinji vangave neruzivo pamusoro pekune varume vatatu ava kuti vazivise mapurisa ari pedyo navo.
Zvichakadai, mapurisa ari kutsvagawo Milton Chihobo (35) uyo anonzi akatiza mushure mekutema nedemo mudzimai wake, Martha Chinawa (43), achibva afa apo vakanetsana paakaona mashoko erudo munhare yake.
Insp Chananda vanotsinhira nyaya iyi yakaitika kudunhu raMambo Chiduku.
“Chihobo, uyo aive akashatirwa, anonzi akatora demo ndokubvunza Chinawa pamusoro penyaya iyi asi akatadza kutaura mashoko akamugutsa. Akamutema padama rekurudyi nekugotsi nedemo. Mudzimai uyu akakuvara zvakanyanya achibva angofira panzvimbo.
“Chihobo akabva anyangarika mushure mekupara mhosva iyi uye achiri kutsvagwa nemapurisa,” vanodaro Insp Chananda.
Online Reporter