Online Reporter
Nkosilathi Sibanda
UKUZE kulondolozwe imvelo, impilakahle yabantu lenyamazana kunye lomumo womkhathi, ilizwe selihlose ukuthi kuhlanyelwe izihlahla ezingu-18 miliyoni kusiyafika umnyaka ka-2030.
Kuhlelo lolu, kukhangelelwe ukuthi umuzi ngomuzi uhlanyele izihlahla ezilitshumi zezithelo ilizwe lonke.
Lokhu kwethulwe ngumqondisi wogatsha lwe-Agricultural and Rural Development Advisory Services (Ardas) uMnumzana Leonard Munamati, obike ukuba ukuhlanyelwa kwezihlahla kuzaphakamisa ukuqhutshwa kwezinye inhlelo, njengokuphawulwa yi-Rural Development 8.0.
UMnu Munamati uthe ukuze ukuhlanyelwa kwezihlahla kube yimpumelelo kuzo zonke izigaba, sebebambisane lamankampani wosaba lwezihlahla. Ukhulume lokhu ngesikhathi esanda kwethekelela ipulazi lezihlahla zezithelo, elikaDokotela Preachard Donga, eKillarney koBulawayo kunye lakwelinye ipulazi esigabeni seMzingwane.
“Lesi yiso isikhathi sokuthi sihlanyele izihlahla zezithelo. Sinxusa zonke izizalwane ukuthi ziphatheke kuloluhlelo, kuhlanyelwe izihlahla,” kutsho uMnu Munamati.
“Loba ungaze uqale ngezihlahla ezimbili, uyabe ulesandla ekuphumeleleni kohlelo.
“Injongo yethu yikuthi umuzi ngomuzi kuhlanyelwe phose izihlahla ezimbili, kukhangelwe ukuba lezihlahla zezithelo ezifika 3,6 miliyoni, kuthi kusiyafika umnyaka ka-2030, sibe lezihlahla ezingu-18 miliyoni.”
Ukhuthaze izakhamizi emaphandleni lasemadolobheni ukuthi zisebenzise lesi isikhathi sokuna kwezulu ukuhlanyela izihlahla.
