Online Reporter
Nkosilathi Sibanda loFungai Muderere
I-HIGHLANDERS, eqinisweni ivoxe udaka kulisizini kodwa kube kuhle ukuthi ukudlala kuka-Andrew Mbeba kubonakele, kwamukelwa waze wakhethwa kuqula labadlali abenze kuhle.
Akula ongasola, uMbeba ubeyibambile iBosso.
Ngesikhathi kusethulwa amabizo abadlali bebhola lenyawo abatshibilike enkundleni zeCastle Lager Premiership, kusuthiseke inengi labalandeli bomdlalo kuleli, lalabo abawulandele besemazweni aphetsheya.
Ezinye ingcitshi zabadlali ezikhethwe kukhalenda yeligi yeCastle Lager bagoqela uEmmanuel Jalai (Dynamos), Andrew Mbeba (Highlanders), Kelvin Moyo, Tymon Machope (Scottland FC), William Thole, Isheanesu Mauchi, Emmmanuel Ziocha (Simba Bhora), Washington Navaya (TelOne), Billy Veremu, Moffart Abubakar (MWOS) loJarison Selemani (FC Platinum).
Abakhethe abadlali laba zintatheli zomdlalo wenguqu, abaqeqetshi kunye labokaputeni bamaqembu adlale kuPSL kulisizini.
Kuluhlu lwengcitshi lolu kulabadlali beScottland ababili abasebenza gadalala, babayinsika yokuba yintshantshu ka2025, uKelvin Moyo loTymon Machope.
UMoyo ubonakale eyikhokhela emuva, encedisana labanye ukuvala ngci, kungabi lula ukuthi amanye amaqembu abhobozele lula egedini leqembu lakhe.
Bekungeke kusale ohlohle amabhola amanengi ukwedlula abanye uWashington Navaya, oweTelOne. Umdlali lo uzaphiwa isicoco seGolden Boot. Wahlohla amabhola angu-17.
Ekhuluma leZimpapers Sports Hub, uMbeba, odume ngelithi “Tower” enkundleni, uthe ujabule wedlulisa.
“Ngijabule kakhulu njalo ngizizwa ngithobekile ngokuqinisekisa ukuthi ngivotelwe ngokusemthethweni njengomunye wengcitshi zabadlali lonyaka kuligi yeCastle Lager,” kutsho uMbeba kukhasi leFacebook.
“Ukukhethwa lokhu kukhulu kimi. Kuyisitshengiselo sokusebenza gadalala labanye bami eqenjini, kugoqela labaqeqetshi. Ngibonga amehlo lokukhalipha kwalabo abavotayo, abaqeqetshi, intatheli labanye. Ukubona ibizo lami phakathi kwabanye, kunginikeze ukuzethembe lokuthi ngiqhubeke ngidlala kuhle.”
UMbeba uthe ubengeke akwenze lokhu ngaphandle kosekelo lwabanye bakhe eqenjini.
“Ngibonga njalo bonke abasebenza eqenjini. Ngithi siqhubeke ngokubambana lokuxhasana.”
Abadlali abangena kukhalenda yeCastle Lager Premiership 2025:
Emmanuel Jalai (Dynamos), Andrew Mbeba (Highlanders), Kevin Moyo, Tymon Machope (Scottland FC), William Thole, Isheanesu Mauchi, Emmmanuel Ziocha (Simba Bhora), Washington Navaya (TelOne), Billy Veremu, Moffart Abubakar (MWOS) loJarison Selemani (FC Platinum).
