admin
Johas Moyo
ZISELE zithithibele izakhamizi zeMakokoba ngoMvulo kuyonale iviki kulandela ukuzibophela kwenye indoda ebihlala kulelilokitshi okungaziwayo ukuthi ikwenzeleni lokhu nanko phela ayitshiyanga ngitsho umkhondo okhombela ukuthi ukuze izihilele ibihlutshwe yini.
Kubikwa ukuthi indoda le ezibopheleyo ibisaziwa ngelokuthi Sipho nje kuphela njalo ibihlala kukheli ethi 470 eMakokoba.
Abanye bathi bebeyazi ngokuthi nguSekaNkanyiso kodwa lindoda ibingumahamba yedwa sikhathi sonke njalo ibihlala yodwa.
Akukho ngitsho umakhelwane owaziyo ukuthi bekusenzakalani empilweni yalindoda nanko phela kuthiwa ibitshona yodwa njalo ingakhulumi labantu kangako.
UMthunywa esizwa ngokuzibophela kwalindoda uphuthume wayafika kuleyondawo yiloba ethole isidumbu somuyi sesithethwe ngamapholisa.
Omakhelwane kanye lezinini labo bathi badidekile njengoba umuyi ubengumazithulela njalo ehlala yedwa okuyinto enzima kakhulu ukuthi kwazakale imbangela yokufa kwakhe.
Umakhelwane kamuyi ofune ukwazakala ngokuthi nguThuba Ncube ubike ukuthi umuyi ubejayele ukumbona ehamba yedwa njalo ngokumazi kwakhe ubeyindoda ehlala ithule njalo izivalele endlini okuyinto enzima ukuthi batsho imbangela yokufa kwakhe.
“Ngimazi njengomakhelwane kodwa besingajwayelananga ngoba engajwayeleki njalo engaxoxi labantu.
Ubengela bangane njalo ubehlala engani uhlulukelwe.
Kuyadanisa ngoba ehambe kabuhlungu umzwangedwa wakhe wale lawo waze wafa lawo.
Esikwaziyo ngempilo yakhe yikuthi ungumzukulu kaVusa Sibanda olomfowabo owayehlala kuleyondlu kungakabuyi umuyi,” kutsho uThuba.
Abelunga lomdeni babike ukuthi abalakho okokutsho ngaloludaba njengoba kusalindwe amanye.
“Thina kasihlali lapha, umuyi ubehlala yedwa njalo asikwazi imbangela yokufa kwakhe njengoba engatshiyanga ngitsho incwadi nje.
Lathi size esililweni sakhe imuli kayikahlangani ukuthi sikhuphe ilanga azangcwatshwa ngalo,” kutsho uNdlovu.
UMthunywa uxhumane loKhansila wakulindawo uMnumzana James Sithole yena oveze ukuthi umbiko womuntu ozibuleleyo ufikile kuye kodwa isizatho sokufa kwakhe asaziwa.
Online Reporter