Online Reporter
UMUNTU wadalwa ngomfanekiso kaNkulunkulu, njalo nxa kuzalwa umntwana kuthiwa amhlophe ngoba kuthakazelelwa ukuthi umdeni uyaqhela.
Bakhona abantu abathanda ukweyisa abanye abantu ufice bebanyefula bebenza okuyinto okungela ncedo, kanengi nxa usesilindweni samabhasi emadolobheni kuvamile ukuzwa umuntu ethi okunguwindi etsho labo abancedisana labatshayeli bemitshova bakhohlwe abantu ukuthi benza umsebenzi omkhulu wokumemezela ukuthi imota iya kuliphi ilokitshi.
Yebo, bakhona abanye owindi abangawuhloniphiyo umhlaba abazwakala sebeqamba inhlamba injengoba injalo kodwa-ke ungabikela abakazi bezimota bayakhuzwa ngoba kwesinye isikhathi kuyabe kubaxotshela amakhasinde.
Emavikini ambalwa adlulileyo kuthe ngokududulwa kwalabo akade bengela maphepha aqondileyo okuhlala elizweni leNingizimu Africa ngizwe sebehlekwa abanye sekuthiwa okuzinjiva okubuye kungelalutho kumbe kwakusenziwani iminyaka yonke le bakhohlwe ukuthi izolo bekuyibo akade betshaya omakhalekhukhwini becela lokhu lalokhuya.
Ezinye injiva bezijwayele ukubuya ngamakhefu afana leKhisimusi lePhasika bebuya bethwele izibiliboco, lamhlanje inengi labo selisenziwa okungabantu kazana nje ngoba inengi labo lijunyiwe ukuthi lize ekhaya lingazimiselanga latshiya lempahla khonale ngoba phela nxa usuxotshwa elizweni labanikazi ngeke uthwale imitshaqana yakho yonke.
Abanye abahlekwa lamhlanje kungenzeka bathole umsebenzi khonapha kwelakithi ufice sebengabakhonzwayo njalo njengasekuqaleni.
Ngikhumbula lomunye umngane wami esafunda sonke, wayezwela khatshana endlebeni wawuthi nxa ukhuluma laye uze ulingisele langezandla yikho ukuthi akuzwe masinyane, wathi lapho esiyakwenda ngikhumbula umamazala wakhe kazange akufihle ukukhonona kwakhe etshela umntanakhe ukuthi lowomakoti uzakuba ngowakhe yedwa ngoba bona bengasoze benelise ukukhuluma lesacuthe, kodwa ujaha waqina ngokuthi umthanda enjalo.
Kwathi ngokuya kwesikhathi uninazala wahlaselwa ngumkhuhlane wetshukela lomalukazana owayethi yimbebebe embiza ngebizo lokuchothoza nguye owayemfake kuMedical Aid yakhe wayeselatshwa esibhedlela esikhulu esidulayo edolobheni lakoBulawayo, kwathi ngelinye ilanga esebone akwenzelwa ngumalukazana wakhe owamthwala waze wayakweletshwa elizweni leMelika lapho okulemitshina esezingeni eliphezulu lamadokotela ayizikhwica mfundo wathi esesilile wamxolisa umalukazana wakhe wamnika ithokazi lenkomo ethi ngoba into amenzele yona yehlule ukuthi yenziwe ngabantwabakhe abaphuma kwesakhe isisu.
Phela umngane wami wayehola ngengowani inkampani ayeyisebenzela yayizimele yodwa njalo ehola amadola eMelika. Abanye okwejwalekileyo ukuthi beyiswe ngabakhubazekileyo.
Kwesinye isikhathi abantu bayeyisana ngemihlobo uzwe bethi okungamaNdebele, okungamaTonga kumbe okungamaShona labo ngabantu njengabo bonke abantu okumele sikwenze yikufunda indimi zabo ukwenzela ukuthi ungahambela kulowo mhlubulo okukhulunywa lololimi ungathwali nzima wenelise ukuphathiseka kalula.
Abanye ngothola benika abantwana bezintombi amabizo amanengi nengi okubaphoxa kodwa bethi sebegugile uthole sekuyibo ababanakekelayo kumbe bebabambele udondolo lapho amehlo esefiphele engasaboni. Yikho ngithi emhlabeni sonkeni siyadingana akulamuntu okuthiwa kalancedo omunye lomunye ulesipho sakhe kufuna nje umbekezelele.
Ayixabene.
