Online Reporter
Lovemore Dube
UMQEQETSHI wenguqu owodumo uCosmas “Tsano” Zulu uyakhala ngamaqembu amakhulu, ebika ukuthi kaselamfutho.
UZulu owadlalela amaqembu amanengi agoqela iHighlanders, Zimbabwe Saints, Bushbucks leOlympics, uthe iDynamos leHighlanders yizo ezaziphethe ibhola leZimbabwe zisekelwa ngabanengi njalo lenkundleni zitshibilika kubencane indawo.
Uthe sokwasala amabizo nje.
Lokhu uthe kubangelwa yikungaqakathekisi amaqembu abasakhulayo. Uthe kudala kwakufundiswa ibhola lokuthi umfana wayethi nxa esehluma abe yimbabazane edlala esazi lesiko leqembu.
“Ngilokudana ngengikubona kuDynamos leHighlanders. Sebalahla isiko lokuzilolongela ababo abadlali abakhula besazi lesiko lokunqoba elisemaqenjini la. Akusakhangelwa abafana abasakhulayo ukuthi baphekwe babe zingcitshi ezizadlala kumaqembu la. Khathesi ungabuza umuntu emgwaqweni ukuthi abalise abadlali abakuwonala amaqembu, kuyethusa, kabaziwa,” kutsho uZulu.
Uthe kudala kuwo wonke amaqembu elizwe kwakungaswelakali abadlali beHighlanders ngoba u-Ali Dube wayebaza ingcitshi zodwa.
“Sasisiba leZimbabwe Under-17, 20, 23 lenkulu kugcwele abadlali beHighlanders ngoba uDube wayebadinga ebhuqwini azosebenza labo, abalolonge kuze kuphume intshantshu ezifana laboMadinda Ndlovu, Peter Ndlovu, Willard Khumalo, Mercedes Sibanda, Mpumelelo Dzowa, Ronnie Jowa, Thulani Ncube labo Benjani Mwaruwari.”
Uxwayise amaqembu la ukuthi asebenze ekhangele okwenziwa ngamanye.
Uthe okudanisayo yikuthi kulezi insuku amaqembu akhulelwa ngamaqembu amancinyane.
“Sokwasala amabizo nje akusela lutho. Kuyadanisa ukuthi kumaWarriors akade ese-United Kingdom kunyanga edluleyo bekuloMongameli Tshuma kuphela.
“Kwakumnandi ngensuku zeDream Team lama1980 silabadlali abambalwa kuWarriors leDynamos ilabayo,” nguZulu.
IDynamos leHighlanders zizadibana ngeSonto eBarbourfields kumdlalo weCastle Lager Premiership.
