Online Reporter
Nkosilathi Sibanda
INDAWO zokulahla izibi enzikini yedolobho lakoBulawayo ziyasilela, ngakho ikhansili ibeke isicelo kulabo abangenelisa, ukuthi baphathise ngokunikeza amabhimu.
Kusilela amabhimu angu-337.
USodolobho uDavid Coltart ukhuthaze ikakhulu amankampani ukuthi anikele amabhimu ngoba ukwanda kwawo kuCentral Business District kuzaphathisa ukwehlisa ukulahlwa kwengcekeza indawana yonke.
“Kusilela amabhimu angu-337. Ngokubona kwami, ukunikeza amabhimu kuluhlelo oluhle, ngoba amankampani angasebenzisa lokhu njengethuba lokuthengisa amabhizimisi awo,” kutsho uColtart, ekhuluma kuMasiyePhambili Weekly.
UKhansila uColtart wenza isicelo lesi kumankampani ngesikhathi ikhansili iphiwa amabhimu angu-60 ngenye yamankampani akoBulawayo, iMasters Paint and Hardware.
“Sibeka ingqobe kwamanye amankampani ukuthi alungisele okwenziwayo.”
Uthe inhloso yabo yikuthi koBulawayo kungabi lengcekeza, kube lidolobho elihlanzekileyo njengele Kigali, eRwanda.
“Inhloso lombono wethu yikuguqula lelidolobho libe ngelihlanzeke ukwedlula wonke eZimbabwe. Sizwa ngeKigali, eRwanda, elinye lamadolobha ahlanzekileyo e-Africa. Umbono wethu yikuthi sifane leKigali.”
Ophethe isikhundla sikaCleansing Superintendent ekhansilini uMnumzana Nkanyiso Ndlovu uthe: “Singengenza inani lamabhimu, sizakwehlisa ukulahlwa kwengcekeza. Sibonga amankampani azimisele ukuqeda ubutshapha edolobheni lethu,” kutsho uMnu Ndlovu.
