Online Reporter
Fungai Muderere
UMQHUDELWANO weChibuku Super usufike kubanga lokucina njalo sekuhlohlwe amabhola angu-23, okuveze ukuthi amaqembu wonke ebelifuna ithuba lokuthi ayithwale linkezo.
Kumdlalo we-final, kuzadlala intshantshu zanyakenye iDynamos leTriangle. Kuzakuba ngumdlalo omkhulu, kukhangelelwe ukuthi iDeMbare ivikele isicoco lesi eyasithwala ngo2023 lango2024.
Kube yinjabulo kumuli yeDynamos ukufika ku-final njengoba leliqembu likhangelane lokusikwa lizembe kuPSL nxa lingehluleka ukunqoba kumidlalo emithathu eseleyo kuligi yeCastle Lager.
Umqeqetshi uKelvin Kaindu uthe kuyamthokozisa okwenziwe ngabadlali bakhe.
“Okuhle kukho konke yikuthi loba sisadalala kuligi, senelise ukubhuqa amanye amaqembu, safika ku-final,” kutsho lumqeqetshi.
“Ukunqoba kwethu kusinikeze idlabuzane. Besingacabangeli ukuthi sizafika lapha. UNkulunkulu muhle njalo, ngaso sonke isikhathi. Siphiwe ithuba lokuthi abantu babone ubukhulu beDynamos. Sizayithwala inkezo okwesithathu, iminyaka ilandelana.”
Kuliviki abasekeli beDynamos yibo bodwa abahlekelela phezulu ngoba bakhiphe isitha esikhulu, iHighlanders emkhankasweni wenkezo. Zombili ziqede umdlalo zilingana nge 1-1, iBosso ihlohlelwe nguMelikhaya Ncube, iDeMbare ihlohlelwe ngu-Emmanuel Jalai.
Ngesikhathi sembekwa, kunqobe iDynamos nge 5-3.
Okuzakwenza umdlalo weDynamos leTriangle uhlabuse yikuthi zombili zake zayithwala linkezo njalo umqeqetshi weTriangle uGenesis Mangombe wake waqeqetsha iDynamos.
ITriangle yaba yintshantshu yeChibuku Super ngo-2019.
IDynamos ifinyelele ku-final yenkezo le ngokutshaya imbekwa kuphela.
Impumela yemidlalo:
Ihlandla lokuvula:Dynamos 0-0 Yadah (Dynamos yanqoba 4-3 kumbekwa), Triangle 1-0 Kwekwe United
Isigaba sakuqala: Simba Bhora 1-1 Dynamos (iDynamos yanqoba 4-3 kumbekwa), MWOS 2-0 Caps United, FC Platinum 0-0 Manica Diamonds (iManica Diamonds yanqoba 5-3 kumbekwa), TelOne 1-1 Bikita Minerals (iBikita Minerals yanqoba 5-4 kumbekwa), Scottland 1-0 Greenfuel, Ngezi Platinum 0-0 Triangle United (iTriangle yanqoba 6-5 kumbekwa), ZPC Kariba 0-0 Chicken Inn( ZPC Kariba yanqoba 6-5 kumbekwa), Herentals 0-1 Highlanders
Isigaba sama se-quarter final: Manica Diamonds 0-2 Triangle, Dynamos 0-0 ZPC Kariba (iDynamos yanqoba 4-2 kumbekwa), Bikita Minerals 1-3 MWOS, Highlanders 2-2 Scottland (iHighlanders yanqoba 2-1 kumbekwa)
Semi Finals: MWOS 0- 2 Triangle United, Dynamos 1 -1Highlanders (iDynamos yanqoba 5-3 kumbekwa)
Abadlali abahlohla amabhola:
Arthur Banda (MWOS , Witness Shave (Triangle) (2) Emmanuel Jalai, Felix Hammond(Dynamos) Menford Mudzimu (Triangle), Tineyi Tsimba , Tadiwanashe Murasiranwa (Bikita Minerals), Mason Mushore, Learnmore Muyambo, Melikhaya Ncube, Andrew Mbeba (Highlanders), Nigel Matinha , Clive Kwangwari, Wilson Mensah (MWOS), Moses Shidolo, Kingsley Mureremba, Khama Billiat (Scottland), Boid Mutukure (Simba Bhora), Frank Makarati (TelOne), Ali Sadiki, Munashe Bambara (Triangle) (1)
Peter Tanyanyiwa