Online Reporter
Brandon Moyo
ABAFANA bakuleli abekhilikithi, amaChevrons, basendleleni yokuya ePakistan lapho abalande umqhudelwano weT20I Tri-Series, kulandela ukuqeda yonke imidlalo yasekhaya lonyaka.
Kumidlalo yeTri-Series, iZimbabwe izadlala lePakistan leSri Lanka kusukela ngoMvulo ngeviki elizayo.
Abadlali abakhethwe ngumqeqetshi uJustin Sammons bangene enkambeni ngoMvulo kusanda kuphela imidlalo yenkezo yeLogan.
Ekhuluma leZimpapers Sports Hub, ukaputeni wamaChevrons uSikandar Raza ubike ukuba bazamile ukuthi bazilolonge kuzo zonke indawo zomdlalo ngoba bayazi ukuthi kuTri-Series bazadlala lamaqembu azigcitshi.
“Kuhambo lwethu ePakistan sizafunda okunengi. Inkundla zakuleli zehlukene kulezethu, ziyasinda ngakho kuqakathekile ukuhamba siphethe lolulwazi.
“Kumele silungise kakuhle indlela esijika ngayo ibhola kunye lokulitshaya. Lapho esiyakhona kudlalwa umdlalo ophambili, ongafuni abadlali ababuyela emuva,” kutsho uRaza.
Imidlalo le izaqala mhlaka 17 kusiya ku29 Lwezi.
AmaChevrons azaqala ukudlala lePakistana mhlaka 17, enkundleni yeRawalpindi Cricket Stadium, kulandela oweSri Lanka enkundleni efanayo mhlaka 19 Lwezi. Bazalandela komunye lePakistan eGaddafi Stadium edolobheni leLahore mhlaka 23 Lwezi qede lapho bangene enkundleni leSri Lanka mhlaka 25 Lwezi.
Umdlalo wokucina, ozadibanisa amazwe azabe enqobile, uzadlalwa mhlaka 29 Lwezi enkundleni yeGaddafi.
IZimbabwe yacina ukuvakatshela ePakistan ngo2020 kumdlalo webhola elimhlophe lapho okwadlalwa ama-One Day International (ODI) amathathu, kwaphindwa kwadlalwa ama-T20I amanengi. Kwanqoba iPakistan.
Kusenjalo, inhlanganiso yeZimbabwe Cricket (ZC) ngoMvulo kuliviki yethule iqembu lonke elisePakistan.
Abadlali abakhethiweyo:
Sikandar Raza (Ukaputeni), Brian Bennett, Ryan Burl, Graeme Cremer, Bradley Evans, Clive Madande, Tinotenda Maposa, Wellington Masakadza, Tadiwanashe Marumani, Tony Munyonga, Tashinga Musekiwa, Dion Myers, Richard Ngarava, Newman Nyamhuri, Brendan Taylor.
