Online Reporter
Fungai Muderere
UROBERT Sinclair, oyisakhamuzi sakoBulawayo otshova amabhayisikili usecele amankampani amakhulu ukuthi asekele umdlalo wabo, njengalokho okwenziwa kwamanye amadolobho.
USinclair, oleminyaka yokuzalwa engu-56, ukhulume lokhu ngesikhathi ephatheka kumncintiswano wamabhayisikili oweNedbank Tour de Great Dyke ophele ngempelaviki edluleyo.
Umjaho wamabhayisikili lo uqalele eSelous ngoLwesine, eMashonaland West, waphelela eZvishavane esabelweni seMidlands. Abatshovayo basuke eSelous baphumula eKwekwe ngelanga lakuqala. Bavuke baqonda e-Unki Mine, qede bayaphetha uhambo eZvishavane.
USiclair uthe amankampani akoBulawayo kawaphakame, asincedise lathi esincintisa ngamabhayisikili. Ungakhangela, eHarare, kulamankampani asekela abatshova amabhayisikili, kodwa kwelethu idolobho akula. Siyasadalala,” kutsho uSinclair obike ukuba waqala ukuncintisa ukutshova ibhayisikili ngo1993.
USinclair, owafunda eHugh Beadle Primary laseNorthlea High School, uthe loba iminyaka yakhe isihambile, uzaqhubeka encintisa. Ubike njalo ukuba wakhuthazwa ukutshova ibhayisikili nguMark Marabini owake waduma kulumdlalo.
“Ngakhuthazwa nguMark Marabini. Yikuthi nje umuntu usuka angabi lothando emdlalweni ngenxa yokusilela kosekelo lwemali. Loba kunjalo, sizahlalela ethembeni.”
Lonyaka, kuTour de Great Dyke bekulabesifazane abayisitshiya galolunye. Omunye wabo, uPortia Chitendere ubencintisa lomntanakhe uTinashe Temera oleminyaka yokuzalwa engu-17.
“Ngakhutha umncintiswano lo kanye. Ngiyathaba ukubona abanye abesifazane bencintisa lapha. Sengikhuthaze umfanami ukuthi laye atshove ibhayisikili. Kuhle lokhu ngoba umncintiswano uyakhula.”
Abaxhasi bomncintiswano, iNedbank, bathe bazaqhubeka bencedisa.
“Siyingxenye yalumncintiswano obabaza umnotho ongaphansi kweGreat Dyke. Ukuba khona kwethu kutshengisa ukuthi sizimisele ukusekela impilakahle yabantu, ukukhula kwamabhizimusi lomkhonomi welizwe,” kutsho uJoel Gombera oweNedbank.
Owenkampani yeZimplats uLouis Mabiza uthe: “Kithi njengeZimplats, ukuphatheka kulumncintiswano kuyinto enkulu. Siqakathekisa siphinde sikhuthaze abantu Bakithi ngokugcina imizimba iqinile.”
