Vusumuzi Dube
Ethel Ncube
KULABOMAKOROKOZA beShurugwi abenze isihluku komunye wabo ngokumbhaxabula ngengodo andubana bamthele ngamanzi abilayo, wedlula emhlabeni ngoMvulo kuviki ephelileyo.
Kuzwakale ukuthi mhlaka 1 Lwezi uFrancis Mazarire besekutsheketsheni wangena lapho okuhlala khona uTafadzwa Mashove wathatha i-US$2 800 wayayitshayela esikhewini lesithandwa sakhe, engazi ukuthi uzabanjwa acine eseyobulwa ngamanzi abilayo.
Kuvele ukuba uMazarire esetshontshile wahle wathutha waya eLalapanzi. Uthe ekhonale, owayetshontshelwe, uMashove wezwa ukuthi ungaphi, wadinga iqembu labantu abangu-12 balubhekisa khonale eLalapanzi bamthola uMazarire, bafika bambuza ukuthi uyise ngaphi imali, waveza ukuthi iUS$800 wayipha isithandwa sakhe.
Basuka laye lapho babuyela laye eShurugwi. Bathe sebekhonale bafika batshintshana ukumtshaya ngezigodo andubana bamthele ngamanzi abilayo emzimbeni, bamgcina ubusuku bonke. Ngosuku olulandelayo ngehola lika-3 ekuseni bamthwala bamusa esibhedlela seShurugwi District Hospital kodwa ngokusweleka kwenhlanhla wedlula emhlabeni engakafiki esibhedlela.
Intatheli ixhumane lesikhulumi samapholisa eMidlands, uInspector Emmanuel Mahoko obike ukuba babophe amadoda ayisificaminwe mibili.
“Sibophe abasolwa abalandelayo ngecala lokubulala uTafadzwa Mashove (34) we-Athlone eGweru, uSimbarashe Maroora (42) owesiqintini seMaroora ngaphansi kwenduna uNdanga, eShurugwi, Linos Muzanarwo (42), owesiqintini seManjuzu, koGutu, uPassmore Hobo (42) owesiqintini seGandiwa ngaphansi kwenduna uNemangwe, eGokwe, uMelusi Mataruse wesiqintini seMarongwe ngaphansi kwenduna uNhema, eShurugwi, uClain Mafa (23) wesiqintini seNeshuro, eMwenezi, loTalent Manjuzu (29) wesiqintini seMajuzu koGutu, loNoah Musemwa (36) wakuVillage 1, eRuchanyu, eShurugwi. Abanye kubikwa lokhe bengakabanjwa.
Uphethe ngokuxwayisa uzulu ukuthi atshiyane lomkhuba wokulwa ngoba kulicala.
“Sicela uzulu nxa ethe waba lenkinga adinge usizo kwabomthetho ukuze alungisise udaba kulokusebenzisa udlakela,” kuphetha uInsp Mahoko.
Online Reporter