Online Reporter
Rutendo Nyeve
KULAMADODA amabili aleminyaka engu-24 yokuzalwa eVictoria Falls amiswe phambi kwedale likamantshi esetheswa icala lokubhinya umfana oleminyaka engu-15 kulandela ukumthembisa umsebenzi.
USimbarashe Ncube ohlala elokitshini leMkhosana kunye loClinton Ndlovu weChinotimba bamiswe betshiyene ngoMgqibelo phambi kukamantshi weVictoria Falls uMnumzana Tafara Machaya.
Ababili laba bazaphenduke emthethwandaba mhlaka 17 Mfumfu 2025.
Umtshutshisi kulelicala uNkosazana Daphne Ntini ubikele inkundla ukuthi isehlakalo lesi sokuhlukumeza umamangala senzakala ngosuku olungaziwayo ngenyanga kaNhlangula ngo2025.
Umamangala (igama siligodlile) wayelomnewabo oleminyaka engu-17, besiya kuNyawo traditional street dance baze bahlangane loClinton Ndlovu lelinye inina elingaziwayo.
“UClinton Ndlovu wanxusa umamangala kunye lomnewabo ukuthi baye endlini yakhe ukuze bayemenzela omunye umsebenzi. Umamangala lomnewabo bavuma bamlandela baya endlini eseChinotimba.
Kubikwa befika kuleyondlu isimo saguquka.
Indlu le, yayifakwe ilembu lokuyiquma phakathi, uSimbarashe Ncube elele kolunye uhlangothi.
“Ekufikeni kwabo bobane bangena kwelinye ikamelo. UClinton Ndlovu wakhiya umnyango wacela ukubhinya umamangala lomnewabo, abesebabhadala,” kutsho uNkszn Ntini.
Kubikwa abafana laba bala kodwa uNdlovu waqala ukubethusela. Ngenxa yokwesaba benza angathi bayavuma. Omkhulu wenelisa ukubaleka ngemva kokucela ukusebenzisa isambuzi.
UNdlovu lowesifazana baphuma endlini batshiya umamangala yedwa.
Kucatshangelwa ukuba ekuphumeni kwalaba ababili, uSimbarashe Ncube wathutsha wacela ukuhlangana lomamangala wala. UNcube wambamba ngamandla wahlubula impahla wambhinya.
Sengathi kwakungakeneli, uClinton wabuye waphenduka wamhlukuluza futhi.
Inkundla izwe ukuba andubana bakhulule umamangala, ababili laba bathembisa ukubulala umamangala angavele abikele omunye umuntu ngesehlakalo lesi.
Ngemva kwalokhu, bethusela umamangala ngokumbulala.
Kubikwa ngenyanga kaNcwabakazi umamangala wahlatshwa ngumkhuhlane, ekuhlolweni kwakhe kwatholakala ukuthi ulesiki.
Imfihlo le yavela mhlaka 30 Mpandula, umamangala esebikela omkhangelayo okuyikho okwenza ababili laba babotshwa.
