Online Reporter
Sikumbuzo Dabengwa
Isingathekiso yisifenqo solimi esifanisa izinto ezimbili ezingafananiyo. Silakho isingathekiso ukukhomba ubunjalo bento. EsiNtwini siyawasebenzisa amagama afanisayo ekhomba okuthile kanye lokugcizelela inkulumo ukuze ibelesisindo.
Asikhangeleni amabala alandelayo siwachaze:
a) Yintethe — Lapha kutshiwo umuntu ohlakaniphe kakhulu ofaniswa lentethe eyaphuma embizeni esemlilweni.
b) Yinyoka — Lapha kubatshazwa umuntu olivila. Ubunyalala, othanda ukuhlala.
c) Yisikhwehle sakoGasa esiphanda umumbu ngonyezi — Lapha kutshiwo umuntu ohlakaniphe kakhulu, wahlakaniphela eceleni.
d) Lidela — Lapha kuyabe kutshiwo umntwana ophuza ukwenza izinto ikakhulu ebuntwaneni bakhe okungabalisa ukuhamba kwakhe.
e) Nguthathekile — Lapha kutshiwo umuntu omane akholwe alandele laloba ngubani. Uyehluleka ukuzimela aqonde, angeyami komunye.
f) Ngumkhaza — Lapha kutshiwo umuntu onamathela emuntwini esithi sece ukuze athole loba yini ayifunayo, yena akathandi ukuba okwakhe kusetshenziswe.
g) Ngumthakathi! — Lapha sibabaza ikhono umuntu alalo ekwenzeni ulutho oluhle okugqamileyo, kusobala ukuba uyayazi leyonto. Ngumthakathi wezigodo ekwakheni lo!
h) Yinunu — Kubatshazwa umuntu okhangeleka esesabeka ikakhulu ebantwaneni , ubalokubethusa baze bathi yinunu, into eyesabekayo.
i) Yimvu — Lapha sibabaza ukulunga komuntu. Uyimvu ngoba ethule , emnene.
j) Yingilosi — Lapha sibabaza ubuhle bomuntu kusimo sakhe kanye lenhliziyo yakhe. Kalasici njengayo ingilosi emsulwa. Kwande kumantombazana.
k) Yisambane — Lapha kubatshazwa umuntu osebenza nzima ngamandla amakhulu. Kadinwa, kathunywa njalo kalandelwa ngemuva.
l) Lilanga liphuma — Lapha sibabaza ubuhle bentombi ifaniswa lelanga nxa kusisa.
Manengi amagama asetshenziswa kufaniswa izenzo zabantu abathile lezinye izinto ezithile .
Asiletheni amanye bafundi.
