Online Reporter
Ethel Ncube
USOBHUKU uCharity Bhebhe weMguza usekhalaze ngokuswela kwezakhamizi zendaweni yabo impahla yokuthelezela asebike ukuba yikho okubisela indawo le emuva kwezentuthuko.
UBhebhe onguSobhuku we-Acute and Cruise uthe njengesigaba bangathola impahla yokuthelezela isigaba sabo sizathuthuka sibe lengxenye lasekuthuthukeni komnotho welizwe.
“Siyalima izilimo ezitshiyeneyo lapha kodwa uhlupho yikuthi silima ngezulu kuphela. Isikhathi sezulu singavele sedlule asisenelisi ukulima ngoba amanzi siyabe singaselawo kodwa indawo yethu iyavuma sibili ukuthi silime izilimo ezilohlonzi.
“Sicela uHulumende asincedise ukuba sithole impahla zokulima ngokuthelezela ukuze sivule insimu enkulu silime lezakhamizi sithole imali zokuziphilisa lezimuli zethu futhi senelise lokubhadalela abantwana esikolo,” kutsho uSobhuku uBhebhe.
“Isifiso sokulima indawo enkulu silaso kodwa uhlupho yikuthi asilampahla eyaneleyo ukuba sidonse amanzi senze izivande ezinkulu zokuthi silime siwodise izilimo zethu,” kutsho usobhuku uBhebhe.
Ubuye waveza ukuba esigabeni sakhe abantu abanengi abasebenzi kungakho kungaba lezivande bazathola ithuba lokuba basebenze.
“Izakhamizi ezinengi azisebenzi, azilakho lapho ezingathola khona okokuthi ziphile kukho. Umbono wokuthi sibe lendawo enkulu yokulima sithelezela sibuye sithole impahla zokuba silime umnyaka wonke sithelezela kungasiphakamisa kakhulu njalo kungasivulela amathuba okuba sisebenze sithole imali.
“Singajabula kakhulu nxa uHulumende engamukela isicelo sethu asiphakamise ngempahla yokuthelezela abuye asigebhele lemigodi,” kuphetha usobhuku uBhebhe.
