Online Reporter
Ugwalo: Emfuleni wezinyembezi olwalotshwa ngu Ezekiel S K Hleza
Ophezulu Stinta
Ngeviki edluleyo sitshiye oSiponoza sebenabise phansi isotsha elalahlekelwa yibuntu, bengazange bathandabuze loMaNcube lo umalukazana oweyengela buntu basebe mphephuluzile kudala ngohlamvu lombhobho.
Kulapha esibona khona isifundo esikhulu ukuthi umvuzo wokona yikufa ngendlela umalukazana lo owayedelele ngayo umkakhe, wadelela umuzi wabanikazi ngokungenisa inswelaboya yakhe egumeni labanikazi, kambe aluba wayexolelwe ukuthi aqhubeke ngempilo wayezakhangelana njani loninazala? Yebo yena wayevele engelanhlonipho, wayengasoze athinteke kumbe abe lenhloni, pho uninazala kwasekumele abhensele ukungahlonitshwa okungaka, lizwi bani ayezaliphosa kumbe ukulikhupha kumalukazana wakhe wayevele nje esezaphila nzima ngehlongandlebe leli.
Emva kokubulawa kukaMaNcube yakhala yaqaqamba ibhazuka kwanyikinyeka umhlaba, esizwa umdumo omkhulu uMaNyathi wahle waqoqa abantwana bonke ukuthi bangene endlini njengoba kwasekuqubuka impi. Sebecatshile endlini bezwa amazwi aqubula inyongo, ayethi afuna ukunatha igazi likaSidingani loba nje lalimbiza ngelomfowabo, pho-ke nxa sekumele kunathwe igazi lomfo kwasekuyindaba etshaqisa igazi leyo.
Aqhubeka amazwi la abuhlungu ngelithi uSidingani ndini lo wayeyinyoka ehuba ngesisu. Yeki ubuwula bempilo, uSidingani usakhwaza elwela umkakhe owayesebulewe wayekwazi pho ukuthi ubulawa nje kwakutheni kambe kungabe kuluthando olungaboniyo.
Laye aze avungame ngelithi nxa oSipinoza bengambulalanga wayezabulala unina. Umhlolo onganani pho unina wayesebulawelani pho, kodwa lanxa esilwa lomfowabo sengaze aphindisele ngonina pho? Duku duku kwaqala ukugijinyiswana sekukhala lenhlamvu zombhobho, wakhuza uMgandane ngelithi bangaze badubula ngoba babezabulala abantu abangelacala. Kwaginyiswana abaxotshwayo baze bangena endlini lapho okwakulabantu khona, uMgandane wayemnakekela umuntu ongelacala, wabiza abantu bonke ababesendlini ukuthi baphume phandle lakanye baphuma, kwasala kanye abadingwayo. Wajikela ibhomu lentuthu ehitshayo phakathi endlini baphuma bedayeka bahle babamba xhakalazi. UMgandane wambamba uSidingani wambuza ngelilenyembezi ukuthi wayesenzani ngokuhlamukela isizwe sakibo.
USidingani ndini wayevele ebanjwe ngamehlo othando lomkakhe wathi kumfowabo kaqedise umsebenzi wakhe, uyabe esaphilelani pho esehanjelwe ngumduduzi. Kambe ngumduduzi lo owayemkhalela langenhliziyo yakhe yonke.
