Online Reporter
Patrick Chitumba
MUDZIMAI ane makore makumi matatu nematatu ekuberekwa nemwanasikana wake ane makore gumi nemana vakatsva kusvika pakufa mushure mekunge imba yavaiva vakarara mairi yaparadzwa nemoto kuShurugwi mambakwedza emusi weMuvhuro.
Mutauriri wemapurisa mudunhu reMidlands, Inspector Emmanuel Mahoko, vanotsinhira nyaya iyi.
“Mapurisa ari kuferefeta zvakaitika panyaya yekufa kwevanhu vaviri kuVillage 5, munharaunda yeDombojena, musi wa4 Nyamavhuvhu 2026 mambakwedza,” vanodaro.
Insp Mahoko vanoti vakafa ava ndiOnismo Ncube nemwanasikana wake, Thabolihle Dube.
“Zvinonzi munguva dzemambakwedza, VaAdmire Mabveku (45), vekuUmcima 49 Mine kuShurugwi, vakanzwa kuchema kuchibva pamba apa, apo vaiva pedyo. Vakamhanyira pamba apa ndokuona dzimba mbiri dzakapfirirwa nehuswa dzichitsva,” vanodaro.
Insp Mahoko vanoti VaMabveku vakazivisa vamwe vagari, avo vakaedza kudzima moto uyu.
Zvisinei, havana kukwanisa kudzima moto wacho sezvo matenga edzimba akanga atodonhera mukati uye dzimba dzacho dzese dzakanga dzakaputirwa nemurazvo wemoto.
“Mapurisa akazoenda kunzvimbo iyi ndokuwana dzimba dzacho dzese dzatsva kusvika kuita madota. Zvitunha zvevanhu vaviri ava zvakabuditswa mumoto wacho,” vanodaro.
Insp Mahoko vanokumbira veruzhinji vane ruzivo nechakakonzera moto uyu kuti vataurire mapurisa epakamba yeZRP Shurugwi kana kuti ari padyo navo.
