adminCornelius Luphahla
KUBE yisisanasana ubukhwa bezinja eMawabeni lapho amanina amabili abhuqane kwabancane indawo kubangwa ukuthezwa kothango lomunye wabo, uMthunywa ukuzwile lokhu.
Imbedumehlwana le yenzakale ngoLwesihlanu kuviki ephelileyo lapho uMandwandwe Moyo ohlala esiqintini seMlomoliwoto ngaphansi kukaSobhuku uNhlalwenhle Ncube abhansulane loMatutu Sibanda ngemva kokuba umntakaSibanda etheze uthango lukaMoyo.
UMthunywa ukhulume loNkszn Moyo wachaza ukuthi ubuhlungu ngothango lwakhe osoluqedwe ngabakoSibanda.
“Uthango lwami besoluleminyaka emibili luthezwa ngingazi ukuthi luthezwa ngubani. Ngithe ngizihambela emasimini ngisiyakukha idelele ngathola uBheki etheza uthango lwami. Uthe engibona wacela ezinyaweni.
“Ngayabikela unina ngalokhu kodwa yena waqinisa ikhanda wangitshela ukuthi uzangitshaya. Ngathi ngimbuza ukuthi engangitshayela uthango lwami njani, wahle wangisukela ngezibhakela,” kulandisa uNkszn Moyo.
UMthunywa wenelise njalo ukukhulumisana loNkszn Sibanda wachaza ukuthi okwenza walwa loNkszn Moyo yikuthi wayethi ufuna ukumtshaya abuye atshaye lomntanakhe.
“Okwenza ngalwa loMaMoyo yikuthi wathi ufuna ukungitshaya lomntanami yikho nje ngambisela ngoba lami ngizivikela.
“Noma ngalwa laye kodwa uthango lwakhe angizake ngilutheze njalo umntanami ngangingamthumanga ukuthi ayetheza uthango lwakhe,” kutsho uNkszn Sibanda.
Intatheli ibuye njalo yaxhumana loMnumzana Lizwe Ncube esinye isakhamuzi sakule indawo wachaza ukuthi indaba le ilindele ukuyathoniswa enduneni.
“Indaba le kayiphelanga khona izakuyamangalwa enduneni uGwebu ngoba uNkszn Sibanda uthi ufuna ukubhadalwa abuye abiyelwe uthango lwakhe nguNkszn Moyo,” kuphetha UMnu Ncube.
Online Reporter