adminEthel Ncube.
IZIFUBA sezihlezi phansi kuzakhamizi zeHabane, eSigodini ngamalungiselelo asesenziwa yiMzingwane Rural District Council ukuthi babiywe amachibi agcina amanzi engcekeza ngemva kokukhitshwa kodaba lolu kuphephandaba likazulu kunyanga ephelileyo.
Kuzwakale ukuba ikhansili yeSigodini isiqalisile ukugebha amagodi okufaka izigodo ukuze kufakwe ucingo lokubiya lindawo le njengendlela yokuvikela inkomo labantwana ukuthi bangaweli phakathi.
Ngesikhathi uMthunywa ebhala indaba le izakhamizi zazikhala ngokuthi abantwana kunye lenkomo basengozini yokuwela emachibini engcekeza le. Izakhamizi lezo zaveza ukuba inkomo zazo zinatha amanzi engcekeza la okucina kubangela ukuthi inkomo zazo zibulawe ngamawemusi (tape worms).
Iphephandaba likazulu likhulumisane lesinye isakhamizi seHabane uJoel Moyo yena oveze ukuba umsebenzi lo osusenziwa yikhansili muhle kakhulu.
“Siyajabula kakhulu ngokubona sekuqalisiwe ukufakwa izigodo okutsho ukuthi sekufakwa ucingo ukuze kungabi lesifuyo kumbe umuntu ofinyelela kule indawo.
“Sibonga usibalukhulu weMzingwane ngokuzwa isikhalazo sethu njalo lokusukumela kwakhe phezulu. Besihlala siphethe izibindi ngezandla ngoba sisesaba ukuthi kwelinye ilanga sizathola abantwana begalule emachibini la kodwa lamuhla uvalo kasiselalo ngitsho,” kulandisa uMnu Moyo.
Intatheli ixhumane lokhansila wakule indawo uPatson Sibanda othe ikhansili isiqalisile umsebenzi wokubiyela amachibi la.
“Ngumsebenzi omuhle lo abawenzayo njalo izifuyo labantu sokuzavikeleka engozini yokuwela phakathi kwamachibi la. Ngikhuluma nje abantu baphezu komsebenzi kumachibi la belungisa ukuthi kubiywe,” kutsho ukhansila Sibanda.
UMthunywa uxhumane loChief Executive Officer weMzingwane Rural District Council uMnumzana Ndumiso Mpofu yena ochaze ukuba baphezu kokubiyela amachibi la.
“Sesiqalisile ukubiyela amachibi amanzi engcekeza eHabane,” kuphetha uMnu Mpofu.
Online Reporter