admin
YiNtatheli kaMthunywa
AMAPHOLISA akuleli asekhuthaze abalimi ukuthi bafake izifuyo zabo uphawu ukwenzela ukuba benelise ukuzithola nxa zingalahleka.
UInspector Emmanuel Goko okhangele isigaba seNkabazwe uveze ukuba ukufaka inkomo umtshiso kuqakathekile ngoba abathengi bakwamanye amazwe nxa bethenga inkomo zakuleli kumele bazithenge zilomtshiso otshengisa ukuba ngezakuliphi ilizwe.
“Inhlanganiso yeVeterinery Services ilomtshiso wayo owesigaba ofakwa esandleni senxele, njalo lalabo abavela kwamanye amazwe abathenga inkomo zakuleli bayabe befuna ukuzithola zilomtshiso lowo.
“Umlimi angalahlekelwa zinkomo zakhe ulakho ukuzithola masinyane ngoba zilomtshiso otshengisa lapho ezivela khona, njalo nxa zingaba lomkhuhlane kulula ukuba zelapheke ngoba zisaziwa ukuthi ngezangaphi.
“Umlimi angathenga inkomo komunye umlimi akumelanga adinde umtshiso wakhe phezu komtshiso womunye, kufanele afake owakhe eceleni abesefaka umzila onqumayo phezu komtshiso omdala okuyabe kuyikucitsha umtshiso omdala,” kutsho uInsp Goko. UInsp Goko uqhubekele phambili wathi abalimi kumele bafake izifuyo zabo umtshiso kumbe uphawu ngalesi sikhathi somqando ngoba izilonda zakhona ziyaphola masinyane kulanxa kuqathaniswa lesikhathi sezulu kumbe esokutshisa.
“Njengamapholisa sesikhathele ngokubopha abantu abayabe betshontshe inkomo ezingelamtshiso okucina kusiba nzima ukuthi sazi ukuthi ngezikabani owangaphi.
“Ukungafaki umtshiso kwenza njalo kubelula emaseleni ukuthi angatshontsha inkomo lezo afake owazo umtshiso kube sekukhanya sengathi lezonkomo ngezabo,” kuphetha uMnu uIsp Goko.
Online Reporter