admin
Msilisi Dube
INHLANGANISO ezimele yodwa eyeYouth Development Trust (YDT) isiphathise izikolo ezinengi zeMatobo ngempahla yokufunda ngenhloso yokuphathisa abafundi bakulesisigaba ukuze benze ngcono ezifundweni zabo.
Kuzwakale ukuthi abafundi abanengi bakulumango abenzi kuhle ezifundweni zabo ngoba ingwalo zokubala ziyasilela.
Umqondisi walinhlanganiso uMnumzana Max Moyo uthe njengenhlanganiso bakhetha ukuncedisa abasakhulayo laba ukuze baphumelele ezifundweni zabo.
“Abafundi abanengi bezikolo zemaphandleni abalangwalo zokubhalela kanye lezokubala okucina kubangela ukuba bengenzi kuhle emsebenzini yabo yesikolo.
“Kungakho saqoqana njengenhlanganiso sakhetha ukuthi sibancedise ukwenzela ukuba bathole ingwalo ngoba sesinanzelele ukuthi impahla yokufunda iyasilela ezikolo lezi okucina kubangela ukuthi impumela yabantwana layo ingabinhle,” kuchaza uMnu Moyo.
Inhlanganiso le kubikwa isiphathise izikolo ezilitshumi; ezintathu ngezemfundo yaphezulu kukanti eziyisikhombisa ngezemfundo yaphansi.
“Phakathi kwezikolo lezi kuleWhite Waters, Njelele leMazhayimbe kuthi ezebanga laphezulu zigoqela iBazha, Nqindi, Fumugwe,” kuchasisa uMnu Moyo.
UMnu Moyo uqhubekele phambili wathi kuzikolo lezi sebenelise ukuphathisa abantwana ngemali zesikolo kanye leyinye impahla etshiyeneyo.
Uthe ngaphandle kwalokho bayancedisa njalo kunhlelo zokunikeza abantwana abenze kuhle ezifundweni zabo imvuzo.
“Siyaphatheka njalo kumikhosi eyenziwa kulezizikolo ikakhulu kwezemidlalo. Kwezemidlalo sithatha abantwana abalitshumi kusikolo sinye ngasinye esibafundisayo” kutsho uMnu Moyo.
Online Reporter