Online Reporter
YiNtatheli kaMthunywa
Amapholisa eZimbabwe Republic Police (ZRP) aseqinisekise uzulu ukuthi kulokuthula elizweni lonke jikelele.
Kusitatimende esifakwe kunkundla yokuxhumana ye-X eyayisaziwa ngokuthi Twitter lamuhla ekuseni amapholisa ancome uzulu ngokulandela umthetho kunye lokuhleleka.
“I-ZRP yazisa umphakathi ukuthi kuphephile elizweni njalo kulokuthula,” kutsho isitatimende lesi.
“Umphakathi uyanconywa ngokuhamba kuhle kwezimota lokusebenzisana lamapholisa ekugcineni umthetho lokuhleleka elizweni.”
Iziphathimandla ziveze ukubaluleka kokubambisana phakathi kwabezomthetho lezakhamizi, zaphawula ukuthi ukuziphatha ngendlela ehlelekileyo emigwaqweni lasezindaweni zomphakathi kuyibufakazi bokuzimisela komphakathi ukuthi kube lokuthula.
Isitatimende lesi siza ngesikhathi ilizwe lilungiselela imkhosi emkhulu, egoqela ukuvulwa ngokusemthethweni kombukiso weZimbabwe International Trade Fair (ZITF) koBulawayo.
