Online Reporter
Peter Matika
AMAPHOLISA abophe abasolwa abane eBeitbridge laseChisumbanje abatholakale belamabhokisi azinqwaba, alamambodlela omuthi wokukhwehlela ongekho emthethweni.
Imithi le; iBroncleer leBenylin, kucatshangelwa ukuthi ibizathengiswa ezitaladeni.
Kubotshwe u-Ozzie Sibindi (45), Kilet Sibanda (33), Siluze Ncube (24) loClifford Mufambi (40).
Amapholisa athe ukubotshwa kwabasolwa laba kuza ngemva kokuba beqaphele ukwanda kokusetshenziswa lokuthengiswa kwemithi engekho emthethweni, ikakhulu eyaziwayo ukuthi iyadaka.
Isikhulumi samapholisa elizweni, uCommissioner Paul Nyathi, uqinisekisile ukubotshwa kwabasolwa laba, ebika ukuba uphenyo seluqalile ngenhloso yokuthola umthombo wemithi le lokuveza ukuthi bebeyisa ngaphi kwelizwe.
Uthe amapholisa akasoze aphele amandla ekulweni lokuthengiswa kwemithi engekho emthethweni, egcizelela ukuthi imithi efana leBroncleer kanye leBenylin isetshenziswa ngendlela eyingozi, ikakhulu ngabantu abatsha, okuphinda kuphazamise impilakahle emphakathini.
“Mhlaka 8 Nhlolanja, amapholisa eBeitbridge abophe uOzzie Sibanda (45) loKilet Sibanda (33), kulandela ukutholakala belemithi engabhaliswanga emthethweni. Abasolwa laba babehamba ngemota yohlobo lweToyota Quantum elama-number plates elinye ilizwe,” kutsho uComm Nyathi.
Uthe amapholisa athole amabhokisi alomuthi we-Broncleer angu-82, linye ngalinye lilamambodlela angu-50. Amanye amabhokisi angu-38 ayelamabhodlela eBenylin angu-48.
Kwelinye icala elifanayo, amapholisa eChipinge, eManicaland abopha uSiluze Ncube loClifford Mufambi.
“Amapholisa athole imithi engabhaliswanga emthethwethi kwenye indlu eChecheche Phase 5, eChipinge.
“Amapholisa axwayisa umphakathi ukuthi amangalele loba ngubani othengisa imithi engekho emthethweni,” kutsho uComm Nyathi.
Abasolwa bazamiswa emthethwandaba besetheswa icala lokwephula umthetho weMedicines and Allied Substances Control Act.
