Online Reporter
YiNtatheli kaMthunywa
UKUPHEPHA ngesikhathi sombukiso weZimbabwe International Trade Fair ngokunye okungumlandu wamapholisa akuleli.
Lokhu kuvele ngesikhathi isikhulumi samapholisa koBulawayo, uInspector Nomalanga Msebele exwayisa uzulu ngendlela zokuphepha kokwehlukeneyo ngesikhathi sombukiso lo ohuga abantu abanengi abavela endaweni eziseduze lakhatshana.
Uthe ngesikhathi sombukiso lo, imigulukudu layo iyathatha amathuba ukutshontshela abantu.
U-Insp Msebele uxwayise uzulu ukuthi akulamisebenzi kungakho abantu bangaze baqhatshwa edolobheni futhi akulamali edojwa emgwaqweni.
“Bantu bakithi, akulamali edojwayo uzwe sekuthiwa asambe siyeyehlukaniselana, akulamuntu futhi oqhatshwa esitaladeni, ngoba imisebenzi kayikho.
“Lezi zindlela ezisetshenziswa ngamasela ukutshontshela abantu,” kutsho uInsp Msebele.
Uqhubekele phambili waxwayisa abazali abahamba labantwana ukuthi babone ukuba bayababamba zonke izikhathi.
“Labo abahamba labantwana sicebisa abazali ukuthi bangababambi ngezandla ezisemgwaqweni ngoba abantwana bengathatheka ngabakubonayo bacine bengena emgwaqweni babe sebetshwaywa zimota.
“Okunye okuqakathekile yikuthi ungakasuki labo ngekhaya ubone ukuba uzakwenelisa ukubagcina bephephile ngoba kuba labanye ababuya ngitsho labantwana babomakhelwane bacine sebesehluleka ukubakhangela. Kuhle ukuthi ubhale iphetshana ufake inombolo zikamakhalekhukhwini zakho kunye lekheli yakho esikhwameni somntwana ukuze angalahleka kubelula ukuthi atholakale,” kuchasisa uInsp Msebele.
Ubuye waxwayisa labo abalezimota ngokugcina izimota zabo ziphephile ngesikhathi seZITF.
“Ukuze sivikele ukutshontshwa kwezimota, sikhuthaza labo abalezimota ukuthi bangaze batshiya impahla zabo eziqakathekileyo ezimoteni ezifana lama-laptop, omakhalekhukhwini, ama-ipad lokunye, ngoba lokhu kwenza amasela acine ebulala amafasitela azitshontshe.
“Lingatshiyi abantwana kunye labantu elibathwala endleleni emoteni ngoba lakho kungabangela ukuthi litshontshelwe izimota,” kutsho uInsp Msebele.
Uqhubekele phambili exwayisa labo abathwala abantu besebenzisa i-Indrive kunye leTap&Go ukuthi nxa bethwala abantu babe lolwazi olugcweleyo ngabantu ababathwalayo ngoba bengatshontshelwa izimota.
“Nxa umuntu efuna ukuthwalwa, ungagijimi nje kodwa dingisisa ngalapho afuna umthwale khona. Yindawo elabantu yini, kayisikho egangeni, ungabona kuyindawo ecatshileyo kutsho ukuba kukhona okunuka santungwana kungenzeka uthwaliswe impahla ezitshontshiweyo, kucine sekudingwa wena kukanti wena uyabe ungazi lutho ngazo.”
