Online Reporter
AMAPHOLISA eSouth Africa aseqalise uphenyo ngokubulawa kwabantu ababili ngemva kokuba amadoda amabili etholakale efile eLimpopo Truck Stop eBeitbridge.
Abafileyo, abaleminyaka engu-51 le-32, batholakale belamanxeba okudutshulwa eduze kwemota ebilenombolo zokubhaliswa eZimbabwe.
Isehlakalo sokudutshulwa senzakale ngeSonto njalo akukabotshwa muntu mayelana lecala leli.
Isikhulumi samapholisa eLimpopo, uLieutenant-Colonel Masekela Magoro, uthe amapholisa athole umbiko wesehlakalo sokudutshulwa eTruck Stop leyo njalo aphangisa ukuya endaweni yesehlakalo.
“Ekufikeni kwethu, sithole amadoda amabili elele phansi eduze kweToyota Wish ebilezinombolo zokubhaliswa eZimbabwe.
“Bobabili babelamanxeba okudutshulwa,” utsho njalo.
UMagoro uthe izisebenzi ze-Emergency Medical Services zifike endaweni yesehlakalo njalo zaqinisekisa ukuthi ababili laba besebetshonile.
“Abafileyo bebelamanxeba okudutshulwa ezingxenyeni zaphezulu zemzimba yabo.”
UMagoro uthe akukacaci okwenzakale ngesikhathi sokudutshulwa njalo uphenyo lusaqhubeka ukuze kutholakale ukuthi kwenzakalani.
Ngesikhathi kuqhubeka uphenyo, amapholisa athola isibhamu esasingelayo ilayisensi njalo singelanombolo ye-serial.
“Ngemva kwalokho amapholisa athola isibhamu esingela layisensi njalo esingelanombolo ye-serial.”
Isibhamu lesi satholakala ngemva kokuba imota inikezwe unkosikazi womunye wabafileyo. – IOL
