Online Reporter
Nkosilathi Sibanda
ABALANDELI bomdlalo wenguqu kuleli sebeveze imibomo etshiyeneyo ngenyathelo leZifa elokwengeza amaqembu adlala kuPremier Soccer League.
IZifa ngoMvulo ibike ukuba ihlose ukuthi kube lamaqembu angu-20 azadlala kuPSL. Kulisizini, kunye lakuminyaka edluleyo, bekusiba lamaqembu angu-16.
Inyathelo leli lamukelwe ngendlela ezahlukileyo kumuli yenguqu. Enkundleni zokuxhumana bakhona abalandeli abakholwa ukuthi inyathelo leZifa lize ngoba kukhangelwe ukuthi kulamaqembu abhekane lokususwa kuPSL ngoba engadlalanga kuhle, ikakhulu iDynamos.
Bakhona abalandeli ababika ukuthi Mhlawumbe inkokheli zenguqu zifuna ukuthi zengeze izinga lumncintiswano njengoba iZifa ithe kumele kulandelwe okwenziwa kwamanye amazwe.
Enkundleni zokuxhumana ebulenjini kulempikiswano eveza ukuthi inyathelo leZifa lithinte abanengi.
Umlandeli wenguqu omkhulu koBulawayo uThabiso “Gundu” Dube uthe nxa iZifa izimisile, kumele ibone ukuthi kulesikhwama semali ephezulu, esizasekela iligi elamaqembu amanengi.
“Siwuzwile umbono weZifa kodwa silemibuzo eminengi. Kungani bengaqali ngokuzwa amalunga ePremiership ukuthi athini ngakho. Konke abazakwenza kuzakuya ngokuvumelana kwamalunga la kunye leZifa Assembly.
“Sinanzelele ukuthi kuzafuneka imali ezwayo eyokuthi kusekelwe amaqembu lemincintiswano ezakuba khona. Ngeke siqhubeke ngokuthi kudlalelwe isicoco seligi lenkezo eyodwa kuphela. Siyabe siyizehluleki nxa siqhubeka kunje. Kayizame iZifa kodwa inanzelele ingenzi iphutha ngokugijima,” nguDube lo osekele iHighlanders, ekhuluma lephephandaba likazulu ngoLwesibili.
Nansi imibono yabalandeli etholwe enkundleni zokuxhumana:
Trevor Nyamunokora
“Umbono lo uyancomeka kakhulu, inkinga yikuthi kuhlangana lokuthi iDeMbare ebhekane lokuxotshwa kuligi. Umuntu engaba lomcabango wokuthi kuhloswe ukusindisa iDeMbare ngoba kwake kwenzeka ngomunye umnyaka.”
Wendell Isheanesu Rutsate
“Akusinyathelo elihle leli. Amaqembu kaDivision One azayithatha ngaphi imali njengoba esadalala khathesi. Lukhona yini usekelo. Cabanga ukuthi iqembu eliseGwanda lizayithatha ngaphi imali yokuyadlala leqembu eliseMount Darwin. Ngokubona kwami, umqondo lo wokuhlanganisa uDivision One abame ngawo kancane. Sikhumbule njalo ukuthi kasilankundla ezifaneleyo. LakuPremiership kulenkinga efanayo.”
Dereck Ngwenya
Ngikhumbula kwake kwaba lesinye isikhathi iDynamos isizadliwa lizembe, bakhweza amaqembu kusukela ku-16 ayaku-18 ukuze isale iphakathi.”
MaNcube Thobela
“Ngumbono omuhle kodwa isikhathi kayisiso. Okwakhathesi sidonsa kanzima ngenkundla zokuphatha amaqembu akhona. Amaqembu kawalamali. Kungaba njani kuthuthukiswe ingatsha ezikhona, ikakhulukazi kubhola labasakhulayo?”
Qhubani Q Mathuthu
“Babona sengathi kuqakatheke iBosso leDeMbare kuphela ngenxa yokuthi zikubanga lokusikwa lizembe. Bafuna ukuthi abekhona amaqembu la ngoba yikho abathola khona imali.”
Lora Kano
“Licabanga ukuthi sizelwe izolo? Khulumani ukuthi lifuna ukunceda iDynamos ukuthi ingakhitshwa.”
Lenos Nyoni
“Ngumbono omuhle kodwa, kunengi okumele kwenziwe. Kumele sikhangele umdlalo wethu njengendlela yokwethula amathuba emisebenzi lokuzithokozisa. Akudingwe imali, abantu abazi umsebenzi lokusakazwa kakuhle kwemidlalo. Kunengi.”
Gee Mr-Sir
“Kutsho akhona amaqembu avikelwayo ukuze angaze aya ebhuqwini. Kungani lumbono ungakhulunywanga isizini iqala kuhle kwazakale amaqembu adlale esazi ukuba amabili yiwo azezwa ngesigelo. Lapha kusebenza ipolitiki.”
