Online Reporter
Brandon Moyo
IQEMBU lelizwe kumdlalo we-rugby, amaSables, azaphatheka kumncintiswano weWorld Rugby Nations Cup, elungiselela ukuthi ayekunkezo yomhlaba ngo2027.
Imidlalo yeWorld Rugby Nations Cup izabakhona ngoNtulikazi ngomnyaka ozayo njalo kudlala amazwe alitshumi lambili, wonke elungiselela umqhudelwano wenkezo yomhlaba ezabe iselizweni le-Australia.
Kuzakuba leminye njalo imidlalo yeNations Championships ezadlalwa.
Inkezo yomhlaba ka2027 izanikeza amazwe ithuba lokutshengisa amathalenta akhona. INations Championship izancintiselwa yiScotland, Wales, France, Ireland, Italy, New Zealand, Argentina, South Africa, Japan leFiji.
Inhlanganiso yeWorld Rugby ibika ukuba izethula uluhlu lwemidlalo ka-2027 leka-2029 ngokugcweleyo.
Amazwe azaphatheka kuWorld Cup yiCanada, Chile, Georgia, Hong Kong China, Portugal, Romania, Spain, Tonga, Uruguay, United States leZimbabwe.
Umgcinisihlalo weWorld Rugby uBrett Robinson uthe inhloso yokutshintsha ikhalenda lemidlalo yikuthi baqinise imincintiswano.
“Uluhlu lwemidlalo esiluphawulayo olweWorld Nations Cup, Nations Championship leWXV Global Series luqakatheke kakhulu ekuqiniseni umdlalo wethu,” kutsho uBrett.
“Ukuhlanganisa imincintiswano emikhulu le kusinikeza ithuba lokuthi sisekele amazwe angaphansi kwenhlanganiso yethu.
IZimbabwe ingene kunkezo yomhlaba eka2027 ngemva kokuba yintshantshu ye-Africa Cup e-Uganda ngoNtulikazi. Ilizwe lacina ukuncintisa kunkezo yomhlaba kuminyaka elitshumi lantathu edluleyo.
