admin
YiNthatheli kaMthunywa
KULABAFUNDI besikolo seAmhlophe Secondary, elokitshini lePumula koBulawayo abayisithupha abangamantombazana ababanjwe xhaka bebhudla utshwala ekilasini abanye labo bephaquza imbanje ngesikhathi sokufunda.
Isiga lesi senzakale ngoLwesine kuviki edluleyo.
Ngokuzwa kukaMthunywa kubikwa sekuyinhlalayenza yabafundi bakulesi isikolo ukuhlala bedakiwe okucina kubangela ukuba balwe nxa sebephumile esikolo.
Kuzwakale ukuthi ngalelolanga abafundi abaficwa bezinathela utshwala calaceleni ekilasini ngabakuFomu 3.
Omunye umfundi ofunda kulesisikolo ongathandanga ukulotshwa igama lakhe uthe abafundi laba babenatha amasese abanye benatha utshwala bamambodlela.
“Abafundi laba babelokhu betshitsha beqonda e-storeroom besiyanatha utshwala. Abanye basebedakiwe ngoba basebegiqika phansi esamendeni phakathi ekilasini.
“Akekho owayekhuza omunye ngakho babelunguza ukuba akulambalisi othutshayo besebezinathela utshwala babo.
“Ngesikhathi amantombazana la enatha utshwala lobo kwakungelambalisi ekilasini. Abafundi ababenatha utshwala lobu ngabaku Fomu 3. Ngesikhathi amantombazana la esanatha kulomunye njalo umfana ongu Fomu 6 owabanjwa elebhola lembanje laye kukhanya wayesedakiwe,” kuchaza lumfakazi.
Umfundi lo uqhubekele phambili wathi okubangela ukuba abafundi laba bahlale njalonje bezinathela utshwala yikuthi kuyabe kungelambalisi obafundisayo.
“Esikhathini esinengi ababalisi bayabe bengekho ekilasini kungakho abafundi laba bacina sebezinathela santando. Utshwala lobo bangena labo esikolo busesikhwameni zabo zokuthwala izingwalo besebezinathela ke ngesikhathi sezifundo nxa ababalisi bengekho,” kulandisa lumfakazi.
Omunye umbalisi ofundisa esikolo lesi uthe kuliqiniso ukuba kulabafundi ababanjwa benatha utshwala.
“Ngeviki edluleyo sathola udletshana kwabanye abafundi ukuba kulabantwana abadakiweyo esikolo. Sababuzisisa labo ababedakiwe bala kodwa bacina sebevuma ukuba banathile.
“Sabiza abazali babo ukuba bezobona ubutshapha obenziwa ngabantwababo,” kuchaza lumbalisi ongathandanga ukuqanjwa ngebizo ngoba esesabela umsebenzi wakhe.
UMthunywa ukhulume labanye abazali mayelana lokudakwa kwabafundi esikolo se-Amhlophe baveza ukuba ukuziphatha kwabafundi lokhu kubangelwa yikusuka emakhaya angelamthetho.
“Abafundi laba ungananzelela inengi labo bahlala bodwa ngekhaya ngakho sebajayela ukunatha utshwala ngekhaya. Esikolo lesi akulamthetho oqinileyo kungakho ukunatha kwabafundi kuvele kuyindaba endala.
“Umphathisikolo kumele abone ukuba uyabiza amapholisa bezohlola abafundi laba nxa bengena entubeni yesikolo ngoba kukhanya babuya labo busezikhwameni,” kulandisa uNkszn Sibanda.
Omunye njalo umzali othande ukwaziwa ngokuthi nguMaMoyo nje kuphela uthe ababalisi kumele benze umsebenzi wabo hatshi ukwekela abafundi bebodwa.
“Okubangela ukuba abafundi laba benathe utshwala yikuthi bayabe bebodwa kungelambalisi ekilasini. Ababalisi kumele babone ukuba bayafundisa ukwenzela ukuba bengatholi ithuba lokunatha.
“Kusukela kudala abafundi besikolo lesi babesaziwa ngokudakwa. Asikwazi ukuba uhlupho lusebazalini kumbe lukubabalisi babo,” kuchaza uMaMoyo.
Umqondisi wezemfundo koBulawayo uMnumzana Dan Moyo uthe kakawutholi umbiko wokudakwa kwabafundi laba.
“Kulihlazo ukuba abafundi benathe utshwala esikolo.Abaphathi bakulesosikolo bebengakangitsheli lutho ngesiga lesi,” kuphetha uMnu Moyo.
Online Reporter