admin
Msilisi Dube
NGENXA yokuthanda inyama okungela mkhawulo, kulamanina esiqintini seMankwa, eHwange endele esithenjini okubikwa abhulane kwaba luthuli ngezikhuni kubangwa umhwabha.
Limbedumehlwana kubikwa yenzakale mhlaka 24 Nkwekwezi ngesikhathi amanina la epheka egumeni.
Umfakazi obikele uMthunywa ngendaba le, uMnumzana Japhet Ndlovu ubikele iphephandaba leli ukuba amanina la agiqana aphosa atsha eziko kubangwa isitshebo lesi.
“Kwaqhamuka impi phakathi kuka Nkosazana Juliet Ncube owendele esithenjini loNkosazana Sinanzeni Moyo.
Amanina la atshayana ilanga selizatshona ngesikhathi belungiselela ukupheka ukudla kwantambama.
‘‘MaNcube wabuza unyanewabo uMaMoyo ngomhwabha owawusele ngelanga eledluleyo kodwa kazange amphendule. Kukhanya ukuthula kwakhe akumphathanga kuhle ngakho wasembuza ngolaka.
“UMaMoyo laye waphendula engakhethi amabala okwacina kubangela ukuba ababili laba batshayane,” kuchaza uMnu Ndlovu.
UMnu Ndlovu uqhubekele phambili wathi amanina la atshayana okwesikhathi eside ngakho uNkszn Ncube wacina esedobha isigodo.
“UMaNcube wacina edobha ugodo lwengalane watshaya ngalo uMaMoyo ekhanda wabuya wamphinda ngalo eqolo okwabangela ukuba awele phansi.
“UMaMoyo wagijinyiselwa esibhedlela seHwange ngoba wayeselamanxeba ekhanda lemzimbeni,” kulandisa lumfakazi.
UMthunywa uthintane loNkszn Ncube ecingweni waveza ukuba kuliqiniso ukuba watshaya unyanewabo kodwa wathi sebaxolelana.
“Amaphutha ayatholakala phakathi kwezimuli ngakho sakhuzwa emapholiseni saxolelana.
“Mina ngangicatshulwe yikuthi ngathi ngimbuza ngesitshebo wangiphendula kubi yena emncane kulami.
Ngabona engani kangihloniphi njalo uyangidelela yikho ngamtshaya,” kuphetha uNkszn Ncube.
Isikhulumi samapholisa eSabelweni seMatabeleland North uInspector Siphiwe Makonese uthe ubengakalutholi loludaba.
Online Reporter