admin
Johas Moyo
ABALIMI ilizwe lonke jikelele bakhuthazwa ukuthi bavundise insimu zabo besebenzisa umquba wezifuyo ngoba kuvuselela kuhle umhlabathi kanti njalo akudingi indleko ezinengi.
Ababona ngempilakahle yezifuyo abeLivestock Production Development baveze ukuthi ukuvundisa amasimu ngomquba akubulali umhlabathi njengokusebenzisa amafethalayiza. Ekhuluma loMthunywa uMnumzana Mike Nemashakwe onguLivestock Production Officer esabelweni seMatabeleland North ukhuthaze abalimi ukuthi bavalele izifuyo zabo kuma-paddocks ngenhloso yokuthi ubulongwe bubuthane ndawonye okuzakwenza bathole umquba omuhle.
“Sikhuthaza abalimi ukuthi bavalele izifuyo zabo emasimini abazalima kuwo ukuze zincedise ukuthi zivundise lowo mhlabathi,” kutsho uMnu Nemashakwe.
Uthe abalimi kabangazihluphi ngokuthenga abafethalayiza kodwa kabathenge ukudla baphe inkomo bazivalele endaweni abazalima kiyo ngoba lomchamo wazo uyavundisa inhlabathi.
“Abalimi bangavundisa njalo insimu zabo besebenzisa umlotha kanye leziduli ngoba sokuvele egcekeni ukuthi amafethalayiza la ayabulala umhlabathi ngokunjalo indawo ezinengi zifuna umquba wezifuyo,” kutsho uMnu Nemashakwe. Uqhubekele phambili ngokukhuthaza abalimi ukuthi bananzelele inani lezulu abalithola ezindaweni zabo ngoba lesi ngesinye sezizatho ezenza babe lesivuno esiphansi.
“Abalimi kabananzele inani lamanzi abalitholakalayo, lokho kwenza benelise ukuthi bakwazi ukuthi bafake umvundiso onganani. Indawo ezinengi kazila zulu ngokunjalo sikhuthaza abalimi ukuthi bangasebenzisi amafethalayiza ngoba etshisa izilimo zabo.
Uphethe ngokukhuthaza abalimi ukuthi badinge ulwazi kubalimisi ngendlela abangavundisa ngazo umhlabathi wabo bengasebenzisanga amafethalayiza.
Online Reporter