adminNcekwenhle Ncube
NJENGOBA isikhathi sokutshisa sesifikile iziziba lemithombo yamanzi sekuzakutsha.
Kungakho-ke abalimi bayaxwayiswa ukuba bananzelele izifuyo zabo zingabulawa ngamawemusi atholakala emithonjeni esisitsha amanzi.
Umkhuhlane wezibungwana lo uvame ukubulala izifuyo ngesikhathi sokutshisa.
Lokhu kungenxa yokuthi izifuyo zinatha amanzi angahlanzekanga kanti njalo ayabe eseludaka.
Isixwayiso lesi sivele kudokotela wezifuyo eVeterinary Services uDokotela Pollex Moyo oveze ukuthi abalimi kumele bazame ngendlela zonke ukuthi izifuyo zabo zinatha amanzi ahlanzekileyo.
Ekhuluma lentatheli kaMthunywa uDkt Moyo uchaze ukuthi zinengi izibonakaliso umlimi angabona ngazo ukuthi izifuyo zakhe sezilamawemusi.
“Izifuyo nxa sezibanjwe ngumkhuhlane wamawemusi zibonakala ngokuhuda kakhulu.
Okunye njalo ziyacaka ngoba izibungu lezi ziphila ngegazi lezifuyo,” kutsho uDkt Moyo.
Uqhubekele phambili esithi nxa abalimi sebethe bakunanzelela konke lokhu kumele bavakatshele abalimisi ukuze baphiwe imithi efaneleyo njalo bafundiswe indlela esetshenziswa ngayo.
Amawemusi la ahlasela zonke izifuyo kugoqela imbuzi, izimvu kanye lenkomo.
Ngakho-ke kulesilinganiso esithile esemithi esiphiwa abalimi ukuze belaphe izifuyo zabo.
Intatheli ixhumane lomunye umlimi weGwanda esigabeni seManonkwe uMnumzana Papa Dube yena ochaze ukuthi isifo samawemusi siyingozi enkulu ezifuyweni kodwa bayenelisa ukukwelapha ngesintu.
“Izibungwana ziyingozi ezifuyweni.
Thina njengoba ezomnotho zingamanga kuhle sisebenzisa isintu ukuvikela lokwelapha izifuyo zethu.
“Izifuyo zethu nxa zingatshengisa izibonakaliso zokuthi zilezibungwana siyagxobagxoba intolwane yentaba siyifake emanzini besesizinathisa,” kuphetha uMnu Dube.
Online Reporter