UMTHUNYWA

Indoda (22) ibulala, itshise umqhatshi insuku ezimbili

YiNtatheli kaMthunywa

KULENDODA eleminyaka engu-22 yokuzalwa yeGweru ebulele umqhatshi wayo ngemva kokuba ekhuzwe ngendlela asebenza ngayo, yabuye yatshisa isidumbu okwensuku ezimbili andubana ichithele umlotha emasimini.

Umetheswacala uTakunda Kazembe (22) obeqhatshiwe epulazini eliseWoodend eGweru, ubotshwe kulandela ukubulala umqhatshi wakhe, uFungai Mpofu olemninyaka engu-53 mhlaka 28 Mfumfu.

Kusitatimende isikhulumi samapholisa elizweni, uCommissioner Paul Nyathi uqinisekise ukubotshwa kukaKazembe, esithi kusolwa ukuthi wahlasela uNkosazana Mpofu ngesikhali esiyinsimbi ngemva kokumkhuza ngendlela ayesebenza ngayo.

“Umsolwa kusolwa ukuthi watshaya umuyi kanengi ngesikhali esiyinsimbi waze waquleka. Ngemva kwalokho wamvala ngethente,” kutsho uCommissioner Nyathi.

Uthe uKazembe wathi esethole ukuthi uNkosazana Mpofu usefile, wathela iphethulo emzimbeni wakhe wawuthungela ngomlilo.

“Umsolwa kubikwa waqhubeka etshisa isidumbu okwensuku ezimbili andubana achithize umlotha waso ensimini, ngendlela yokuzama ukufihla icala,” kutsho uCommissioner Nyathi.

UCommissioner Nyathi uthe ngemva kokubulala umqhatshi wakhe, uKazembe watshontsha amabele alinganiselwa kumathani angu-1,5 kanye labomakhalekhukhwini ababili bakamuyi, okwathi ngemva kwalokho wakuthengisa.

Kubikwa ukuthi umsolwa wabalekela wabuyela kibo lapho abotshwa khona.

UKazembe ukhangelelwe ukubhekana lecala lokubulala lamanye amacala aphathelane lalo.