UMTHUNYWA

Indoda yeNyathi igwaza ibulale umkayo ngomkhonto

Nkosilathi Sibanda

KULENDODA eleminyaka engu-60 yokuzalwa ebotshwe ngemva kokusolwa ngokubulala umkayo ngokumgwaza ngomkhonto kanengi emzimbeni kulandela ingxabano yokungathembeki emtshadweni.

Amapholisa athe umetheswacala uJabulani Moyo, usolwa ngokubulala umkakhe, uThobekile Tshulu (55), esiqintini seMtshunga eNyathi, esabelweni seMatabeleland North mhlaka 14 Lwezi 2026.

“IZimbabwe Republic Police (ZRP) iqinisekisa ukubotshwa kukaJabulani Moyo ngecala lokubulala elenzakala mhlaka 14 Lwezi 2026, eMatshunga Village eNyathi.

“Umetheswacala kubikwa wagwaza umkakhe uThobekile Tshulu kanengi nengi emzimbeni ngomkhonto ngemva kokumbuza ngobudlelwano alabo lomunye owesifazane ngaphandle komtshado wabo,” kutsho umbiko wamapholisa.

Amapholisa athe isidumbu sikaTshulu sathwalelwa esibhedlela se-United Bulawayo Hospitals lapho esigcinwe khona emotsha, kulindwe ukuhlolwa ukuze kutholakale imbangela yokufa kwakhe.

Amapholisa aqhubeke ekhuthaza uzulu ukuthi axazulule ukungazwanani ngendlela elokuthula.