Online Reporter
Ethel Ncube
KULAMADODA amathathu ePlumtree amiswe emthethwandaba ngeviki ephelileyo esetheswa icala lokutshaya umzawabo bamkhuphe amazinyo amathathu ngoba entshontshe inkukhu.
Abasolwa abathi uGents Mthethwa oleminyaka yokuzalwa engu-37, uMaxwell Dube oleminyaka yokuzalwa engu-40 loMdumiseni Ndlovu oleminyaka engu-18 yokuzalwa, abangabazawakhe bakamamangala uKhangekani Muda, kubikwa bambhaxabula ngemva kokuba etshontshe inkukhu.
Umtshutshisi kulelicala uSheila Nyathi ubike ukuba abathathu laba bathola umamangala epheka inyama yenkukhu egangeni.
“Mhlaka 8 Mpandula, abasolwa bathi behamba ebusuku bathola uMuda egangeni ebase umlilo epheka inyama yenkukhu.
“Bambuza ukuba inkukhu uyithethe ngaphi, wathi uyitshontshele unina, umsindo wahle wathi phothololo.
“Abathathu laba bamthelela bambhaxabula okwabangela ukuthi acine ekhumuka amazinyo amathathu bemtshayela ukuthi utshontsheleni.
Umamangala wahamba wayabikela amapholisa, okwabangela ukuthi abetheswacala babotshwe.
Umantshi uJoshua Nembaware, udlulisele phambili ukuthoniswa kwecala leli.
