admin
Munyori weKwayedza
KAMBANI yeMultiChoice Zimbabwe yorumbidza vaimbi vane mukurumbira munyika muno nekunze — avo vanosanganisira Ammara Brown — nebasa guru ravari kuita rekubatsira vanhu vakawirwa nemafashamu emvura yaive nedutumupengo kumatunhu anosanganisira Manicaland neMasvingo.
Mukushi wemashoko kukambani iyi — Muzvare Liz Dziva — vanoti vanonzwa kusimudzirwa zvikuru nezviri kuitwa nevaimbi vakaita saAmmara.
Muimbi uyu ari kubatsira vakawirwa nenjodzi iyi uye nekukurudzira zvizvarwa zvemuZimbabwe nevamwe vane tsiye nyoro kuti vayamure vanhu vakasangana nedambudziko remafashamu nekuvapa zvinhu zvakasiyana zvinosanganisira magumbeze, nhumbi dzekupfeka nezvekudya.
“Ammara ari kuita zvose zvaanokwanisa mukubatsira vanhu vakawirwa nedambudziko reCyclone Idai uye nekukurudzira vamwe kuti vange vachibatsirawo,” vanodaro Muzvare Dziva.
Vanoti hupenyu hwaAmmara hwasanduka zvikuru kubva apo akatanga kuita mukurumbira makore 11 adarika kuburikidza nechirongwa chinobuda paDstv chinonzi Idols Africa.
Muzvare Dziva vanoti kusimukira kwaAmmara munyaya dzekuimba huchapupu hwebasa guru riri kuitwa neMultiChoice Zimbabwe mukuzvipira kwayo mukuvandudza hupenyu hwevaimbi vemunyika muno.
Online Reporter