adminTatenda Shuro
MURUME wemuHarare akaendesa aimbove shamwarikadzi yake kumatare edzimhosva achiti ari kumunetsa nekuenda achinopopota kumba kwake pamusoro penyaya yechikwereti chemari iyo vakapanana vachiri kudanana.
Jonathan Chasora akamhan’arira Memory Musosonora kuHarare Civil Court.
“Uyu aimbove shamwarikadzi yangu, asi ndinokumbira runyararo nekuti anouya kumba achipopota ini ndisipo. Ndoda kuti amiswe kuuya kumba kwangu nokuti andishaisa rugare,” anodaro.
Chasora anoti ave kushaya chimiro munzvimbo yaanogara nekuda kwekugaropopota kunoitwa naMusosonora.
“Ave kundityisidzira zvokutoti ndave kurarama ndichingotya. Akauya mazuva maviri achipengera mari yake zvekutoti vemumaraini vanokwanisa kundipupurira.
“Ndakanomhan’ara kumapurisa asi vakanditi ndiuye kuno kumatare,” anodaro Chasora.
Achipawo divi rake, Musosonora anoti ane dambudziko nechikumbiro chaChasora.
“Ndinopokana nechikumbiro chake nokuti ane chikwereti changu chemari nezvinhu zvangu. Saka akatora gwaro redziviriro raari kuda haazopedze kundipa zvinhu nemari yangu,” anodaro. Anoenderera mberi: “Ndinokumbira dare mundipewo mvumo yekuti andipe zvinhu zvangu. Pakutyisidzira paari kutaura, anoreva nhema nokuti ndinotyisidzira chii hangu? Ukaona munhu anoda kuuya kuzotora gwaro rerunyararo aine chikwereti chemunhu itsotsi chairo.”
Mutongi Nyasha Marufu akapa Chasora gwaro rerunyararo.
Online Reporter