admin
Yintatheli kaMthunywa
IGWAZWE yindodakazi yayo yafa enye indoda yelokitshini leNtumbane koBulawayo ngemva kokuba imphulule izibunu ngeSonto kuyonale iviki, uMthunywa ukuzwile lokhu.
Umuyi uFiso Bhekani Mpofu obeleminyaka engu-45 kucatshangelwa ufe ngemva kokugwazwa yindodakazi yakhe eleminyaka engu-18.
Umfakazi oqotho ongathandanga ukuqanjwa ngebizo njalo ongumakhelwane ubikele uMthunywa ukuthi umntwana lo waphuza ukubuya ngekhaya evela bona ijaha lakhe okwathukuthelisa uyise wahle wamgama ngokumkhuza ngesikhathi engena endlini.
“Umntwana lo kukhanya waphuza ukubuya endlini ngakho wathi efika evela bona ijaha lakhe uyise owayesegane unwabu wamthethisa ethi uyadelela yikho engena endlini sokuhlwile.
“Asazi ukuthi kwahamba njani kodwa ubaba lo kukhanya wacina ephulula indodakazi izibunu okwabangela ukuthi umntwana lo acaphuke andubana athathe ingqamu wayithela kuyise.
“Ababesendlini bathe besizwa umsindo lo bahle babiza i-ambulensi eyafika yathwalela uMpofu esibhedlela. Kukhanya uMpofu wafika watshela odokotela ukuthi uwele phezu kwengqamu yamgwaza,” kulandisa umakhelwane lo.
Kubikwa odokotela abazange bakukholwe lokho ababekutshelwa ngakho bamtshela ukuthi abasoze bamelaphe nxa engakhulumanga iqiniso.
Umfakazi lo ubuye waveza ukuthi umuyi wacina eseveza ukuthi ugwazwe ngumntanakhe kodwa ngokuswelakala kwenhlanhla uMpofu wacina ebhubha ngenxa yokulahlekelwa ligazi elinengi.
UMthunywa uzwe ukuthi ogogo bakametheswacala bayayifihla indaba le ngoba besesaba ukuthi uzabotshwa.
Omunye njalo umfakazi othande ukwaziwa ngokuthi nguMaMpo nje kuphela, uthe umntwana lo ubevele elesikhwili loyise ngoba wayesidla imali yakhe yesikolo.
“Umntwana lo uyafunda njalo unina ubemthumezela imali yesikolo kodwa uyise ubeyitshayela esikhewini. Kukhanya ngelanga leli umntwana lo aze aphuze ukubuya wayevele ejonge ukuthi uyise amthethise abesemgwaza.
“Asazi ukuthi udaba lolu luzaphetha ngani ngoba abantu bayazi ukuthi kwenzakalani kodwa abangakibo kamuyi kukhanya abafuni lakuyithi vu lindaba kungakho-ke izakhamizi zizithulele nje zithapha ngamehlo,” kutsho lumfakazi.
UMthunywa ukhulume logogo kamuyi, uMaSibanda oveze ukuthi abantu baqambela umzukulu wakhe amanga ngoba laye wayekhona mhlalokho.Omele isikhulumi samapholisa koBulawayo uAssistant Inspector Abednico Ncube uthe uluzwile udaba lwendoda efe ngemva kokugwazwa yingqamu.
“Sithole udaba lwendoda ebhubhe ngemva kokugwazwa yingqamu. Umuyi waveza ukuthi wawela phezu kwengqamu ayeyithwele ngakho yasimlimaza wasesifa.
“Lokhe sisachwayisisa kabanzi ngodaba lolu,” kuphetha uAsst Insp Ncube.
Online Reporter