adminCharity Moyo
ZIMADOLONZIMA izakhamizi zeMashava ngemva kokuba umntwana obelamalanga amabili enyamalele edojwe efile ecuywe izitho zomzimba.Umhlola lo wenzakale ngoLwesihlanu kuviki edluleyo.
Kuzwakale ukuthi umuyi obeleminyaka yokuzalwa elitshumi, uTawananyasha Tembo utholakale efile bucwadlana lentatshana eseduzane leGaths Mine.
Kuvele ukuthi umntwana lo ubeselamalanga amabili enyamalele. Kubikwa kwaziswa amapholisa wona azama ukudingisisa ngomkhondo wakhe kodwa ehluleka.
Umfakazi obikele uMthunywa uMnumzana Tendai Sibanda uveze ukuthi ngelanga kuthiwa kabonakali wayebonakale ehamba emgwaqweni eqonde ezitolo zeBalmain lapho ayesiyavakatshela abangane bakhe.
Kuzwakale ukuthi umuyi kazange aphinde abonakale evela ekudlaleni kungakho abazali bakhe baqalisa ukumdinga.
“Wonke umuntu esigabeni wayesithi ucine uTawananyasha esiyadlala ekuseni ngitsho labangane bakhe okuyikho okwahle kwasolisa ngitsho labazali bakhe.
“Ngemva kwamalanga amabili wabonwa ngomunye umfanyana esefile egangeni,” kutsho uSibanda.
Elinye ipholisa elisebenza eMashava Police Station elafika lapho okwabonakala khona isidumbu sikamuyi libikele uMthunywa ukuthi wayengagqokanga njalo wayesekhutshwe ezinye izitho zomzimba.
“Isidumbu sikamuyi sasithola singelampahla njalo ezinye izitho zomzimba zazicuyiwe,” kuchaza lumpholisa ongathandanga ukuqanjwa ngebizo ngoba esesabela umsebenzi wakhe.
Intatheli yenelisile njalo ukukhulumisana loyise kamuyi, uMnumzana Gabriel Tembo oveze ukuthi indaba le iliqiniso njalo imzwisa ubuhlungu kakhulu.
Uveze ukuthi ngelanga umntanakhe anyamalala ngalo wayesuke esithi uyabona abangane bakhe. Uqhubekele phambili esithi bamangala ukubona engaphendukanga okuyikho okwahle kwabasolisa.
“Mhlalokho wavalelisa ekuseni esithi uyadlala labangane bakhe. Samangala kodwa sibona ilanga litshona engekho okwenza sahle sasabalala simdinga.
“Kuthe ngelanga lesibili kulapho abonakala khona efile kodwa equnywe isitho sangasese, ngikhuluma nje samngcwaba engaphelelanga,” kutsho uMnu Tembo.
Ubuye wathi akukho angakutsho kodwa utshiya udaba emapholiseni ayiwo achwayisisa kabanzi ngalo.
Ubuye wathi ulethemba lokuthi izigangi lezi zizabanjwa ziphiwe isigwebo esifaneleyo.
Online Reporter