marble nkomo
Lovemore Dube
UNOMSA Moyo owadlalela iqembu lamaMighty Warriors uthe kuyiwa phambili, kumele kubonwe ukuthi abesifazane bayathola ithuba elide lokuthi balungiselelwe imidlalo.
UMoyo ukhulume ngemva kokuhlaziya imidlalo yomqhudelwano weCosafa Women’s Championships obuqhutshelwe eSouth Africa.
Iqembu lakuleli lakhutshwa kumncintiswano yiSouth Africa, linqotshwa 4-2 kumbekwa ngemva kokuba umdlalo wabo uphele kungutshiki lobhanqa 1-1 kusikhathi esisemthethweni kusemi-final.
Basala belethemba ukuthi sokudlalelwa umklomelo wesithathu banganqoba, bakhulelwa yiZambia 3-1.
“Abesifazane kumele babelesikhathi balolongwe bevalelwe. Kumele badlale imidlalo lamanye amazwe kubonwe ukuthi bakuliphi ibanga bengakayi kumidlalo emikhulu.
“Thina ngesikhathi sethu sasihlala phose inyanga ezintathu sesisebenza,” kutsho uMoyo.
Uncome ibhanga le-Ecobank loHulumende ngokuza phambili ukuthi iphathise ngokupha idlabuzane ngemali.
Uthe kumizamo yokuphakamisa ibhola labomama kumele kuqalwe phansi ngamankazana aphansi kweminyaka eyi-17 le-20 yokuzalwa.
“Labo bamele bavalelwe kusetshenzwe ukuze babengabadlali abangcono abangamela indaba lamanye amazwe. Akumelanga silinde ukuze kubelemidlalo ye-Cosafa ukuthi silungise.”
Esadlala, uMoyo wayephakathi kwenkundla, esenza umathanda, ehlohla njalonje, eyimbabazane.
Uthe nxa kungakhitshwa imali, kulesikhathi sokulolonga iZimbabwe ingaya kude.
UMoyo uthe amanye amazwe ayasebenza njalo alakho ukudlalisa abadlali abatshiyeneyo kumincintiswano munye ngamunye.
Ubuye njalo wancoma uRutendo Makore loAgnes Tumbare abafakwe kuqembu lamalunga ayi11 okuthiwa badlale kuzinga elibukekayo njalo eliphezulu kumidlalo le eSouth Africa.
“Adlale kuhle amankazana ethu, nxa isikhathi singabasinengi kungabakuhle, ngiyajabula ngalaba ababili abakhethwe kuX1, zindaba ezinhle sibili,” kutsho uMoyo.
Ukuze ifike kumaqembu amane aphezulu, iZimbabwe yadla iqembu leSwatini 2-0, yabhuqa iBotswana 1-0 kwabangutshiki lobhanqa leZambia 0-0.
Online Reporter