admin
YiNtatheli kaMthunywa
“NGIPHUMA amagenga angilumayo. Angilakuthula kusukela lokhu kwaqala nyakenye. Owabangela lokhu ngiyamazi, ngomunye umama weBeatrice engamthathela indoda ngabaleka layo sayahlala eWaterfalls. Nguye owangihambela enyangeni ngoba wavela wakutsho lokhu.”
U-Bethsider Lewis (24) — lo ohlala eNgoni, eNorton, kodwa edabuka eMhondoro — nguye okhala ezimathonsi. Loba ukuhlala achume nje akusavumi njalo ngesikhathi intatheli ikhuluma laye ubesenza angani uyalunywa esenwaya okungapheliyo.
Yiloba nje wayeleyakhe indoda, uLewis uthi wathandana lendoda yomngane wakhe le acina ebaleka layo besiyahlala eWaterfalls, eHarare.
“Sengizwile bakithi! Khonapha umama lo owangifaka isiqalekiso lesi uyala ukungikhulula. Ngiyavuma ukuthi ngona ngokumthathela indoda kodwa ngicela uxolo. “Kangilanhloni ukukhuluma indaba yami ngoba sengikhathele ngokulunywa ngamagenga kanye lamawemusi esithweni sami sangasese njalo sokwamila okuyinyama okufana le ‘cauliflower’, abanye bathi lisale.
“Kwaqala ngisanda kuthandana lendoda yomngane wami yena owahle wangitshela ukuthi uzangi’sotha’ ukuze ngingaphindi ngithathele abantu amadoda abo,” utsho njalo uLewis.
Inina elisakhulayo leli lithi wayelomkakhe owamlobola ngomnyaka ka-2009 njalo bahlala bonke kwaze kwaba ngu-2019 lapho abalana khona ngenxa yetshamali yakhe le ayeselayo.
“Ngangihlala lomkami epulazini leMula eBeatrice njalo silabantwana ababili. Sihlala khonale, ngangizwana lomunye umama owayendile owayegcina umuzi wenye imuli.
“Ngacina ngithandana lomkakhe sahlanyisana, umkami engazi lutho. Indaba le yaphumela egcekeni mina letshamali le sahle sabaleka ngatshiya umkami layo itshamali itshiya umkayo. Sathola indlu e-Uplands, indawo eseWaterfalls.”
Uthi umfazi wetshamali yakhe wamthembisa ukuthi uzazibonela.
“Uthando lwethu lwavutha kanjalo letshamali yami edabuka eMasvingo, sahlaliseka sisithi sesicatshile eWaterfalls kukanti asibuzanga elangeni.
“Mina ngathwala abantwabami ababili yena wabalekela umfazi labantwana ababili. Umngane wami lo ngumfazi wendoda le engasengihlala layo njalo wangitshela ukuthi sizaqedelana njalo phinde ngithandane lendoda yomuntu,” utsho njalo uLewis.
Uthi bahlala inyanga ezinhlanu bonke lapho umngane wakhe ayephenduka kibo ezoncenga indoda ukuthi babuyelelane kodwa indoda isala.
“Ngazithwala singakabalekeli abanye bethu kodwa isisu saphuma sesihlala eWaterfalls. Lapho yikho engaqala khona ukuzwa ngihanjwa yizibungu esithweni sangasese ngilunywa ngokusamagenga kumbe amawemusi. Ngemva kwalokhu ngamila okuzinyama okuluma okuzwayo.”
Uthi wacina esuka lapho ayehlala khona lendoda le. “Ngasuka lapho engangihlala khona lendoda yomngane wami ngenxa yokugula lokhu. Ngahamba ekhaya eMhondoro lapho okulomama kodwa angimtshelanga udubo lwami,” utsho njalo.
Uthi umama lo amthathela indoda uhlala emfonela emtshela ukuthi uzakufa kuphela ngenxa yokumzwisa ubuhlungu akwenzayo.
“Ngithe sengibuyele ekhaya umngane wami lomkakhe baxolelana baqala ukuhlala bonke njalo. Udubo solungolwami.
“Khathesi sengabizwa ngumamomncane wami ngapha eNorton njalo uzama ukungelaphisa kodwa akuncedi,” utsho njalo.
“Umngane wami lo uhlala efona njalo ethi angikaqali ukugula kodwa ngihlala ngicela uxolo kokuphela. Kangilali, ngilala ngikhala ubusuku bonke kubangelwa yibuhlungu engibuzwa nxa ngilunywa ngamagenga kanye lamawemusi khona okulala kungihamba hamba.
“Esibhedlela bathi ababoni mkhuhlane kimi, sokumele ngiyedinga abantu abanganginceda,” nguLewis lo.
“Sengimelele ukufa nje, ngabe lumama uyangixolela bakithi. Umkami uyake abuye ukuzongibona okutshengisela ukuthi uyafisa ukuthi ngiphole,” utsho njalo.
Uthi ngeke aphinde ukuthandana lendoda yomuntu.
“Sengafunda isifundo sokuthi ubuntu kumele azibambe. Indoda yomuntu kayiqalwa, dinga eyakho. Sengizwile bakithi, lesi yisixwayiso engisipha abanye omama.”
Uninomncane kaLewis — uTambudzai Nyatsambo (35) — uthi umntakadadewabo uthwele amagabha avuzayo.
“Imali seyaze yaphela sidinga ongamelapha, sengaze ngathengisa umaqandisa wami .
UMadzibaba Bond Bornservia Gumira weChitungwiza uthi umama lo wafakelwa ulunyoka kungakho kumele elatshwe.
Ukhulu u-Elisha Mutanga weHarare uthi, “Waloywa ngemithi kungakho-ke kumele elatshwe ngemithi yesintu ukuze kuphele.”
Abangabe befuna ukusiza uLewis bangamthinta ku 0776280089.
Online Reporter