admin
Wayne Ncube loJoel Ndlovu
IKHANSILI yakoBulawayo ngoLwesibili kuyonale iviki yenze inkonzo yokubonga lapho ebekukhulekelwa izulu, ukuthula, lothando kanye lokuthuthuka kwedolobho, eLarge City Hall.
Abafundisi bamabandla ehlukeneyo koBulawayo bakhokhele umphakathi ekukhulekeni ndawonye.
Ekhuluma lentatheli uMfundisi Elliot Mandaza obekunguye obeqhuba umsebenzi lo uthe uzulu kumele azithole esezinkozweni ezifana lale eqoqwe yikhansili yakoBulawayo ngoba ukukhuleka libanengi kulamandla.
“Imithandazo yohlobo lolu ilenzuzo enkulu kakhulu kuzulu ngoba ilokubahola kundlela yokuziphatha njalo lokwengeza ithemba eNkosini okusiza ekwakheni ukwethembana lokukhulumisana phakathi kwekhansili lozulu.
“Amabandla abambisana leBCC ngoba elomlandu wokuqinisa ezokholo esigodlweni sethu. Kungabakuhle nxa abantu bangamenywa babuye bebanengi emicimbini elandelayo efana lale,” kulandisa uMfundisi uMandaza.
Ibandla leSeventh Day Adventist likhokhelwa nguMfundisi uChoga bacacisile ukuba inkonzo leyi izakuletha isigodlo esiphuma phambili kungatsha ezehlukeneyo kutshintsha isigodlo kusenza esilobucwebe.
“Kuyadingeka ukuzikhandla lokuthula esigodlweni sakoBulawayo, ngeke sikhulume ngokuthula thina ngokwethu singela kuthula enhliziyweni zethu ngakho umthandazo lo sithanda ukuba uvule inhliziyo zabantu babone ukukhanya kweNkosi okungabakhokhela empilweni zabo.”
Usodolobho wakoBulawayo ukhansila Solomon Mguni uthe ukhuthaza uzulu ukuthi akhulekele izulu ukuze isilinganiso samanzi asemadamu sikhuphuke. “Sihlangane ukuze sikhulekele izulu ngesikhathi isilinganiso samanzi emadamu ethu simi ku 34, 75 percent. Okwakhathesi sesavala ukupontshwa kwamanzi esuka kumadamu amabili athi Umzingwane kanye leUpper Ncema,” kutsho ukhansila Mguni.
Ukhuthaze njalo izakhamizi ukuthi zisebenzelane lekhansili yakoBulawayo ekulondolozeni amanzi amalutshwane elilawo kungalahlwanga ithemba lokuthi izulu lingana njalo. Ukhansila Mguni uqinisekise ukuthi njengekhansili basebenza nzima ukuze bethulele uzulu konke akukhangelele kibo ngobuciko obukhulu.
Online Reporter