Online Reporter
KAKHO owazicelela ukuthi abekhona kulo umhlaba, ngokunjalo kungumlandu womzali munye ngamunye omlethe kulo umhlaba ukuba amnakekele futhi abona ukuba uyamncedisa ukuthi abe lekusasa elihle.
Kungumlandu womzali wonke wokubakwazi ukuthi umntanakhe lapho akhona uvikelekile ngaso sonke isikhathi.
Umsebenzi womzali yikunanzelela njalo ukuba umntanakhe uphila ngendlela efaneleyo. Umzali kumele njalo azi ukuthi ngaso sonke isikhathi umntanakhe uvikelekile kungakhathalekile ukuba usedlulise iminyaka yokuzalwa engu-18, kumbe kakafiki kulelobanga.
Abazali akumelanga bavumele abantwababo ukuthi kuze kuhlwe bengekho ngekhaya. Endulo kwakusaziwa ukuthi abantwana akumelanga baphatshelwe zinyoni bengekho ngakibo.
Yebo umuzi lomuzi ulomthetho wawo ngakho lowomthetho kumele ulandelwe ukuze kube lokuhloniphana ngekhaya hatshi ukuthi omunye lomunye aphile ngendlela afuna ngayo. Lokhu kucina kubangela ukuthi kulelokhaya kucine kungathi kusemahlangeni.
Kwesinye isikhathi uyabona abantwana bedlala phandle ebusuku kungabi ndaba zalutho. Umbuzo uba yikuthi kambe kulowomuzi kuyabe kulomthetho kumbe labo bantwana bayabe behlala bodwa.
Lokhu kuyingozi njalo kuyimfundiso embi emntwaneni. Abadala bathi umthwentwe uhlaba usamila njalo isigogo sigoqwa sisemanzi kungakho umntwana angavunyelwa ukwenza izinto ezingamakhiyo esakhula uyakhula lakho ngoba vele ikhula lamanono ayo. Umntwana engavele ajwayele ukuhamba ebusuku esasemcane kutsho ukuthi lokhu kuzahle kube segazini ukuhamba ebusuku aze alinyazwe yizigebengu.
Kungumbono woMthunywa ukuba abazali kumele bafundise abantwababo indlela abafisa bakhule ngayo ukuze nxa sebekhulile bangaphambuki kuleyondlela.
Okwenza ontanga babonakale yonke indawo emabholohweni, emigwaqweni kanye lemakhoneni kusihlwa lezinsuku yikuthi abazali babo bayabekela benze umathanda bavakatshe phandle kuhlwile. Kambe umntwana onjalo angaba lekusasa elihle na nxa ephila impilo enje? Angithi isiphetho sakhona yikuthi afane xathu lezigebenga ezicathamela abantu ebusuku.
Bakhona njalo abazali abangazihluphiyo ngokwazi abangane abadlala labantwababo, uzwe umzali ethi ngokwakhe lokho. Kuhle ukuba nxa ungumzali wazi abangane babantwabakho ukuze ukwazi ukuba kabatholi imfundiso ezingayisizo ngoba empeleni ikhona imizi elemithetho engamakhiyo umuntu acine esiba lekusasa elingaqedakaliyo ngoba wena njengomzali wehlulekile ukucebisa umntwana ngobubi babantu adlala labo.
Abanye abangane badonsela abanye ekunatheni utshwala kunye lekusebenziseni izidakamizwa kungakho kukhangelelwe ukuba umzali wonke akwazi abantu abadlala lomntanakhe.
Kungumbono woMthunywa njalo ukuthi abazali kumele bafundise abantwababo indlela yobuntu ezakwenza bakhule babe ngabantu abalesithunzi emphakathini abaphila kuwo ngoba ikusasa labantwana lisezandleni zabazali babo.
