adminCornelius Luphahla
NJENGOBA usuku lokuhlanyelwa kwezihlahla solusondele ingatsha zikaHulumende seziqalisile ukuhlanyela lezo zihlahla ezizahlanyelwa ngalolosuku ukuze kuvikelwe ukugugudeka komhlabathi.
UMsekeli kaGeneral Manager wenhlanganiso yeForestry Commission uMnumzana Abedinigo Marufu uveze ukuthi inhlanganiso yabo iyingxenye yengatsha ezilungiselela usuku lwamahlaka 1 Mpalakazi lokuhlanyelwa kwezihlahla.
UMnu Marufu uveze ukuthi kungumlandu wezakhamizi zonke ukuthi ziphatheke kuhlelo lokuhlanyelwa kwezihlahla emhlanganweni owenziwe eMaphisa labakhokheli bezigaba.
Uthe izihlahla lezi kumele ziqale zihlanyelwe phakathi kwamaphepha andubana zifakwe phansi.
“Bakhokheli kuqakathekile ukuthi likhuthaze izakhamizi ezingaphansi kwenu ukuthi ziphatheke ekuhlanyeleni izihlahla ukuze mhlaka 1 Mpalakazi zibe sezilungele ukugxunyekwa.
“Izakhamizi zinengi ezigabeni kungakho nxa isakhamuzi sinye ngasinye singahlanyela isihlahla ngalelolanga umhlabathi ngeke ugugudeke ngoba kuzabe sokulezihlahla ezinengi kakhulu.
“Ngikhuluma nje izikolo ezinengi sezahlanyela izihlahla zazo njalo lezo zihlahla sezimilile sezilindele ilanga lokugxunyekwa,” kuveza uMnu Marufu.
UMnu Marufu uveze njalo ukuthi izakhamizi zikhululekile ukuthi zihlanyele izihlahla lapho ezenelisa khona ukuzihlanyela kungakhathalekile ukuthi kulapho okuqhutshwa khona umkhosi lo kumbe hatshi. Lokhu kungenxa yokuthi umkhosi lo ungabe uqhutshelwa khatshana lalezozakhamizi okudala ukuthi zingenelisi ukuyafika ngakho kuyabe kufanele zizihlanyelele endaweni yazo.
Izakhamizi nxa zithe zahlanyela izihlahla esigabeni sazo kwandise ukuthi zikhule kuhle ngoba kuyabe kuyizihlahla ezivuma kuleyo ndawo.
Online Reporter